14 studzienia troje maładafrontaŭcaŭ byli zaprošany pryniać udzieł u zdymkach moładzievaha sieryjału. Chłapčukam prapanoŭvałasia zhulać zatrymanych pad čas udziełu ŭ masavym mierapryjemstvie. Miescam sustrečy byŭ pryznačany hałoŭny ŭvachod u Dom bytu, na Instytucie Kultury, ale ž na vialiki žal i pa ironii losu, maładafrontaŭcy na zdymki nie trapili. Jak što było — raspavioŭ adziny, chto na dadzieny momant vyjšaŭ na suviaź — Raman Vasiljeŭ.
«My pryjechali na miesca ŭ pryznačany čas i adrazu pabačyli dvuch supracoŭnikaŭ u cyvilnym, jakija prahulvalisia niepadalok. Praź niekatory čas da ich dałučylisia jašče čaćviora. Jany zaniali kropki navokał nas. Za budynkam Doma bytu my zaŭvažyli ŭsim viadomy sini bus, da jakoha, byccam pa kamandzie, nakiravalisia usie supracoŭniki. Jašče praź niekalki chvilin jany, napeŭna, vyrašyli, jakoje „pravaparušeńnie“ my ździejśnili i nakiravalisia ŭ naš bok. My zrazumieli, što zaraz budzie zatrymańnie i pajšli ŭ bok mietro.
Zaŭvažyŭšy, što „cichary“ pabiehli za nami, my kinulisia na ŭciok u roznyja baki».Na momant napisańnia materyjału maładafrontaŭcy Raman Pratasievič i Pavał Siarhiej, a taksama nieviadomy chłopiec, jaki pryjšoŭ razam z Ramanam, na suviaź nie vyjšli. Bolej za toje, pa telefonie Ramana, jaki pieršyja 20 chvilin byŭ nie dasiažny, adkazvaje niejki nieviadomy čałaviek.
«Kali ja telefanavała Romu, adkazaŭ byccam jahony siabra, jakomu Roma pieradaŭ telefon, što ŭžo było niemahčyma, bo chłopcy raźbiehlisia ŭ roznyja baki. Jon skazaŭ, što
jany chavajucca na 3 paviersie Doma bytu i što ich na ŭvachodzie čakajuć supracoŭniki ŭ cyvilnym, prasiŭ pryjechać i zabrać ich, —raspaviała siabroŭka Maładoha Frontu Nasta. — Što jašče dosyć cikava, hołas hetaha nieviadomaha „siabra“ byŭ nierealistyčny i naležaŭ dakładna nie 17-cihadovamu chłopcu».
Miescaznachodžańnie Ramana ź siabram dahetul nieviadoma.
Pavał Siarhiej znajšoŭsia ŭ maskoŭskim RAUSie — na dadzieny momant składzieny pratakoł apytańnia.
* * *
Uviečary Pavał Siarhiej i Raman Pratasievič byli vyzvalenyja z Maskoŭskaha RAUS biez składańnia pratakołaŭ.
