Na zimovaj siesii Parłamienckaj asamblei Rady Jeŭropy (PARIE) u Strasturhu siońnia płanujecca pryniaćcie rezalucyi pa Biełarusi.
Jak paviedamlałasia raniej, 23 studzienia słuchańni pa Biełarusi prajšli ŭ palityčnym kamitecie PARIE. Z boku Biełarusi dla ŭdziełu ŭ ich u Strasburh byli zaprošanyja lidar ruchu «Za Svabodu» Alaksandr Milinkievič, staršynia Abjadnanaj hramadzianskaj partyi Anatol Labiedźka, aktyvist kampanii «Havary praŭdu!» Alaksandr Fiaduta, rektar EHU Anatol Michajłaŭ i Luboŭ Kavalova — maci pryhavoranaha da śmiarotnaj kary Uładzisłava Kavalova.
Paśla słuchańniaŭ dakładčyk PARIE pa situacyi ŭ Biełarusi Andres Chierkiel (Estonija) paviedamiŭ, što asambleja moža rekamiendavać Radzie Jeŭropy ŭvieści ŭ dačynieńni da aficyjnaha Minska takija ž sankcyi, jakija ŭvioŭ Jeŭrasajuz.
Chierkiel nahadaŭ, što ŭ śniežni słuchańni pa Biełarusi prachodzili ŭ jurydyčnym kamitecie PARIE. «Usio heta śviedčyć ab tym, što biełaruskaje pytańnie maje vialikaje značeńnie dla asamblei, — zajaviŭ estonski deputat. — Ja vielmi ŭdziačny asamblei, što na hetaj siesii znojdzieny čas dla praviadzieńnia słuchańniaŭ i abmierkavańniaŭ pa Biełarusi».
Chierkiel paviedamiŭ, što pa vynikach razhladu jaho dakłada na siesii 25 studzienia budzie pryniata nie tolki rezalucyja, ale i dadzieny rekamiendacyi. «My źvierniemsia da Kamiteta ministraŭ Rady Jeŭropy z peŭnymi rekamiendacyjami pa Biełarusi. U pryvatnaści, płanujecca rekamiendavać krainam — členam RIE ŭvieści takija ž sankcyi, jakija byli ŭviedzieny Jeŭrasajuzam u dačynieńni da Biełarusi. Taksama budziem rekamiendavać praciahvać pracu pa padtrymcy hramadzianskaj supolnaści Biełarusi, padtrymcy niezaležnych ŚMI i ŭniviersitetaŭ», — skazaŭ dakładčyk PARIE pa Biełarusi.
