Čamu ŭrad vyrašyŭ źviarnucca pa vielizarny kredyt i čamu mienavita da Rasiei?
Niepasrednaja pryčyna lažyć na pavierchni. Kolki b ni rabili naviersie dobruju minu, nasamreč u ekanomicy i finansach spravy dreń. Biez zamiežnych hrošaj dzirki nie załapiš.
Zachad ža i navat "idejna blizkija" siabry z musulmanskaha śvietu ci Kitaju na takija vialikija hrošy ź Mienskam nie hulajuć. Bo zvažajuć na specyfiku našaje madeli. Kali na toje, dyk u krainy dasiul niama navat suverennaha kredytnaha rejtynhu. I na prystojny — spadziavacca naiŭna.
"U Rasiei ž hrošaj šmat, — kaža niezaležny ekanamist Jarasłaŭ Ramančuk, — ale pytańnie ŭ tym, na jakich umovach daduć".
Jon dapuskaje, što praź niekalki hadoŭ Biełaruś, kiraŭnictva jakoj dasiul hanaryłasia małoj vonkavaj zapazyčanaściu, moža apynucca ŭ daŭhach jak u šaŭkach.
Samaje ž prykraje, što hrošy kidajucca ŭ staruju topku. Urad nia moža pierasiahnuć praź siabie dy pajści na liberalizacyju.
Takija samyja pamyłki rabili niekali Novaja Zelandyja, Kareja, Tajland, nahadvaje Ramančuk. I niepaźbiežna nadychodziła raspłata. U ich tam heta vylivałasia ŭ abvał fondavaha rynku. U nas laśniecca kurs, pojduć u halop ceny.
"Biełaruś ryzykuje pakłaści hałavu ŭ pašču rasiejskaha finansavaha lva", — reziumuje ekspert.
Takim čynam, anansavany Raru etc. "palot na dvuch kryłach" moža zaviaršycca, tak i nie pačaŭšysia. Paśla stolkich praklonaŭ rasiejskamu imperyjalizmu, stolkich pahrozaŭ sadrać try skury za usie vidy tranzytu dy inšyja pasłuhi — aficyjny Miensk idzie na pakłon. Pazyčcie, panovie impercy, hordaj respublicy! (Rasiejski ministar Href ździekliva zaznačyŭ, što prośba "maje prava na isnavańnie".)
Zrazumieła, svajho mierkavańnia nakont drapiežnickich zamašak Kramla naša načalstva nie źmianiła. Alo jość nadzieja niejkimi chitrykami paźbiehnuć ikłaŭ.
Hulnia z prysmakam avantury — stychija Łukašenki. Mentalna ž Kreml značna bližejšy, čym Zachad ź jahonymi zakidonami datyčna demakratyi dy pravoŭ čałavieka. Voś tam tolki sastupi... Varta adnamu kipciu zahruznuć — prapała ptušačka!
Ale rasiejski kredyt skončycca, i ekanamičnyja prablemy jašče macniej voźmuć za horła. Eksperty kažuć pra hod-paŭtara. A dalej... Pahroza vystupaŭ razzłavanaha elektaratu moža akazacca lepšym stymułam da pieramienaŭ, čym jak recepty MVF ci ŭščuvańni van der Lindena.
