Artur Klinaŭ płanuje vydać 32 albomy

Sieryja albomaŭ sučasnaha biełaruskaha žyvapisu «Kalekcyja pARTyzana» znajomić ź biełaruskim mastactvam apošnich 30 hadoŭ.

U sieryi— jakasna vydadzienyja albomy Uładzimira Ceślera, Rusłana Vaškieviča, Artura Klinava i zbornik «Biełaruski avanhard 80-ch».

Pra toje, jakija jašče vyjduć albomy, čamu papularny Uładzimir Ceśler i što jość u albomie sieryi «Biełaruski avanhard 80-ch» raskazvaje “NN” Artur Klinaŭ, stvaralnik sieryi i redaktar časopisa «pARTyzan».

Alaksiej Ždanaŭ. «Mutant Siamionaŭ».

Artur Klinaŭ. «Pakarańnie Puhačova».

Alaksandr Małčanaŭ. «Miensk. 1980-yja».

Andrej Plasanaŭ. «Kampazicyja ŭ styli bluz».

Naša Niva: Jak źjaviłasia ideja stvareńnia sieryi?

Artur Klinaŭ: U Biełarusi šmat jaskravych postaciaŭ, ale adsutničaje art-prastora, tamu biełaruskim tvorcam davodzicca realizoŭvacca na jeŭrapiejskich placoŭkach. Pra isnavańnie našaj art-sceny ŭnutry krainy mała chto viedaje, samoha pracesu prosta nie bačna. Tamu

my vyrašyli zrabić sieryju albomaŭ, tak by mović, «viarnuć» biełaruskich mastakoŭ na Radzimu. Heta encykłapiedyčnaja sieryja, svajho rodu The Best za 30 hadoŭ.

NN: Jakaja kancepcyja ŭ sieryi?

AK:

Albomaŭ budzie 32, kožny ź ich maje svaju litaru na vokładcy.

Chaciełasia b, kab pieravažali aŭtarskija zborniki, ale buduć i tematyčnyja vypuski. Naprykład, «Biełaruski pop-art», 90-ja hady, ci nulavyja. Zaraz u druku ŭžo znachodzicca albom A.R. Č. Heta małady, i pakul nie vielmi viadomy mastak. Była Jaho vystava ŭ halerei «Ŭ». Tvorčaść A.R.Č. vielmi kontraviersijnaja, i, jak pakazała vystava, bolšaść nie razumieje hetaha mastactva. Ale my vyrašyli, što varta rabić nie tolki albomy «kłasikaŭ», ale i maładych mastakoŭ, što majuć pracy, jakich by chapiła nie na adzin albom. Hety albom budzie vielmi supiarečlivy i pravakatyŭny.

NN: Albom «Biełaruski avanhard 80-ch»: pa jakim pryncypie adbiralisia pracy mastakoŭ?

AK:

U 80-ja byŭ stvorany sapraŭdny biełaruski andehraŭnd, u albom my ŭklučyli ludziej, jakija stajali la stvareńnia hetaha kaściaka, alternatyvy partyjnamu žyvapisu.

Mahčyma dzie-niebudź u Francyi hetyja tvory avanhardam nie nazvali b. Adnak dla nas heta byŭ sapraŭdny kulturny vybuch, kali źjavilisia dziasiatki fantastyčnych imionaŭ. Hetaja epocha vielmi słaba zachavałasia — i my zrabili encykłapiedyju avanhardu.

Karciny adbirali tyja, jakija ŭdałosia znajści: šmatlikija pracy znachodziacca za miažoj. My ŭ asnoŭnym abapiralisia na dźvie kalekcyi — Andreja Plasanava i Alaksieja Ivanova.

NN: Jakich albomaŭ čakać sioleta?

AK: Sieryja budzie vychodzić nie hod i nie dva.

Za hety hod chaciełasia b vypuścić albomy try-čatyry. Najpierš zrabić albom Alaksieja Ždanava, jaki pamior u 93-m. Chočacca vydać albom Ihara Kaškureviča.

Mahčyma sioleta vyjduć zbornyja albomy — nie tolki žyvapisu, ale i fota.

NN: Ci kuplajuć albomy sieryi?

AK: Cikaŭnaść jość — takich sieryj u Biełarusi jašče nie było.

Nakład alboma Ceślera sa śvistam razyšoŭsia. Kožny choć krajem vucha čuŭ pra jaho, ale voś alboma, jaki možna było b pamacać, pahladzieć dahetul nie było.

I Ceśler — heta ciažkaja artyleryja, paśla jaho ludzi pačynajuć cikavicca i inšymi albomami sieryi.

My zrabili vielmi demakratyčny košt,

darečy, nie zakładajem prybytku.

Juraś Uskoŭ

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH