Infarmacyja ab praviercy vynikaŭ hałasavańnia ŭ finale «Jeŭrafestu» paćviardžajecca 6

Niekalki krynic paćvierdzili BiełaPAN infarmacyju ab tym, što pravodzicca pravierka vynikaŭ hałasavańnia ŭ finale «Jeŭrafestu».

Nahadajem, 16 lutaha partał Tut.by paviedamiŭ ab tym, što z-za nieadnaznačnaj reakcyi hramadskaści na vyniki finału «Jeŭrafestu» Alaksandr Łukašenka rasparadziŭsia razabracca, nakolki abjektyŭna byŭ vyznačany pieramožca konkursu, i dla hetaha stvorana śpiecyjalnaja kamisija, kudy nibyta ŭvajšli pradstaŭniki šerahu ministerstvaŭ i viedamstvaŭ, u tym liku śpiecyjalisty pa abaronie infarmacyi.

Jak paviedamiŭ lidar hurtu Litesound Dźmitryj Karakin, pavodle jaho infarmacyi,

kamisija sapraŭdy pracuje, ale jaje skład «zasakrečany, kab paźbiehnuć karupcyjnych dziejańniaŭ z boku zacikaŭlenych ludziej».

«Da mianie taksama dajšła infarmacyja, što pa vynikach hałasavańnia hledačoŭ my pieramahli», — skazaŭ Karakin. Ciapier hurt čakaje aficyjnych vynikaŭ pravierki.

Členy kamisii taksama hutarać z pradstaŭnikami žury konkursu.

Adzin z sudździaŭ, śpiavak Alaksiej Chlastoŭ, raskazaŭ BiełaPAN, što padčas takoj razmovy ŭ jaho, naprykład, pacikavilisia mierkavańniem ab usich finalistach i spytali, jakija acenki jon pastaviŭ kožnamu kankursantu.

«Ja spakojna skazaŭ, što dazvalaju publikavać svoj biuleteń, kab ludzi bačyli, jakija acenki ja pastaviŭ», — skazaŭ śpiavak. Razam z tym jon nie staŭ paviedamlać, kim mienavita byli jaho surazmoŭcy, paćvierdziŭšy tolki, što heta byli členy kamisii.

Miž tym u samoj Biełteleradyjokampanii praciahvajuć nastojvać na tym,

što nie viedajuć ab isnavańni jakoj-niebudź kamisii.

Vykanaŭčy pradziusier telekanała «Biełaruś 1» Dźmitryj Baranaŭ zajaviŭ, što ŭ jaho niama infarmacyi ab praviadzieńni pravierki.

«Toje, što ciapier adbyvajecca, — usio na ŭzroŭni čutak i domysłaŭ. U nas niama nivodnaj papiery, nivodnaha lista, nijakaj uvachodziačaj dakumientacyi nakont hetaha», — skazaŭ Baranaŭ.

U pres-słužbie Biełteleradyjokampanii infarmacyju ab pracy kamisii taksama nie kamientujuć.

Raniej kiraŭnictva Biełteleradyjokampanii abiacała, što na praciahu niekalkich dzion paśla praviadzieńnia finału konkursu buduć apublikavany vyniki telefonnaha hałasavańnia, adnak heta nie zroblena.

Nahadajem, pa vynikach finału «Jeŭrafestu», jaki adbyŭsia 14 lutaha, było abjaŭlena, što Biełaruś na «Jeŭrabačańni-2012» u Baku budzie pradstaŭlać śpiavačka Alena Łanskaja. Zhodna z praviłami konkursu, pieramožca vyznačaŭsia šlacham sumavańnia vynikaŭ hałasavańnia telehledačoŭ i prafiesijnaha žury. Viadučyja «Jeŭrafestu» abjavili ŭžo prasumavanyja hałasy.

Anastasija Sałanovič, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH