Novy KaAP abjadnaŭ usie pałažeńni, što byli raniej zamacavanyja ŭ prezydenckich ukazach i dekretach, a taksama ŭ pastanovach Saŭminu. Pieršapačatkova jon byŭ uchvaleny Pałataj pradstaŭnikoŭ u 2003 h., ale z taho momantu ŭvieś čas dapracoŭvaŭsia. Novy dakument skapijavany z Kryminalnaha kodeksu – jon utrymlivaje šmat paniatkaŭ KK. Što novaha ŭ Kodeksie?
Zamiežnikaŭ‑parušalnikaŭ buduć departavać
KaAP‑2007 praduhledžvaje novy vid administracyjnaha spahnańnia – departacyja, jaki budzie ŭžyvacca ŭ dačynieńni da zamiežnych hramadzianaŭ i asobaŭ biez hramadzianstva za ździajśnieńnie šerahu administracyjnych pravaparušeńniaŭ (dahetul dadzienaja pracedura rehlamentavałasia Zakonam RB ad 29 śniežnia 1998 h. «Ab imihracyi»).
Ciapier departacyja moža być užytaja da zamiežnika i asoby biez hramadzianstva ŭ jakaści dadatkovaha vidu spahnańnia nia tolki za parušeńni praviłaŭ znachodžańnia i tranzytnaha prajezdu praź Biełaruś, ale i za pazapraŭnaje pierasiačeńnie dziaržaŭnaj miažy, pamiežnaha režymu abo režymu ŭ punktach propusku. Hetaja miera adkaznaści budzie pryznačacca z ulikam charaktaru i nastupstvaŭ pravaparušeńnia, a taksama asoby vinavataha.
Novaje zakanadaŭstva kankretyzuje pieralik dakumentaŭ, bieź jakich znachodžańnie ŭ Biełarusi źjaŭlajecca administracyjnym pravaparušeńniem. Heta viza Biełarusi, mihracyjnaja karta, sapraŭdny pašpart, dazvoł na časovaje znachodžańnie abo rehistracyja i h. d. Departavanamu zamiežniku abo asobie biez hramadzianstva pryznačajecca termin zabarony ŭjezdu ŭ krainuu. Z ulikam akaličnaściaŭ, jakija pasłužyli pryčynaj departacyi, jon vahajecca ad 1 da 10 hadoŭ.
Dyscyplinujuć kiroŭcaŭ i minakoŭ
Značna ŭzrastaje adkaznaść za kiravańnie aŭto ŭ niećviarozym stanie: štrafy siahajuć za miljon rubloŭ, taksama heta moža abiarnucca administracyjnym źniavoleńniem dy pazbaŭleńnia pravoŭ na try hady. Ciapier pjanymi kiroŭcami buduć zajmacca sudy.
Ad siońniašniaha dnia kiroŭcam varta zabycca na telefonnyja razmovy ŭ časie ruchu. Abaviazkovaj robicca zamiena humy na kołach pry pierachodzie na zimni sezon.
Minaki taksama musiać być pilnymi: parušeńnie praviłaŭ darožnaha ruchu buduć karacca adčuvalnymi štrafami: ad 15 da 620 tysiačaŭ biełaruskich rubloŭ. Maksymalny štraf nakładajecca ŭ vypadku, kali pa vinie minaka adbudziecca DTZ, udzielniki jakoha atrymajuć cialesnyja paškodžańni, albo kali ŭ vypadku avaryi pacierpić aŭto.
Padvojnaja adkaznaść
Akramia departacyi zamiežnych hramadzianaŭ novy kodeks prapanuje jašče adzin vid pakarańnia – časovaja zabarona pa dziejnaść (prypynieńnie licenzii). Hetaja miera u pieršuju čarhu zakranie pryvatnych pradprymalnikaŭ, jakija u vypadku ździajśnieńnia pravaparušeńnia mohuć pazbavicca, naprykład, licenzii na prodaž alkaholu.
Novy Kodeks vyklikaje naściarohu tym, što stvaraje mahčymaść dla padvojnaj adkaznaści. To bok pakarańnie peŭnaha pradpryjemstva, jak jurydyčnaj asoby, nie padbaŭlaje ad adkaznaści jaje kiraŭnika, jak asoby słužbovaj.
Źjaviłasia dakładnaje vyznačeńnie terminu «słužbovaja asoba», jaki paniej datyčyŭ tolki tych pryvatnych pradprymalnikaŭ, što mieli najmitaŭ. Ciapier hety termin raspaŭsiudžvajecca na ŭsich. Treba zaŭvažyć, što pamier štarfu dla zvyčajnaha hramadzianina i słužbovaj asoby značna adroźnivajecca.
Usie administratyŭnyja parušeńni źviazanyja z ekanomikaj ciapier buduć razhladacca haspadarčymi sudami.
Było 15 – stała 25
Złosnych parušalnikaŭ administratcyjnaha prava čakaje małapryjemny siurpryz – novy dakument praduhledžvaje padaŭžeńnie maksymalnaha terminu administracyjnaha aryštu da 25 sutak. Raniej jon składaŭ 15 sutak. Da 15‑sutkavaha terminu, u vypadku składańnia dvuch i bolej pratakołaŭ, ciapier buduć davać dadatkovy termin – da 10 sutak. Pravaabaroncy miarkujuć, što hetaja miera pakarańnia budzie aktyŭna vykarystoŭvacca suprać niełajalnych isnujučaj uładzie hramadzianaŭ.
Biaspłatny advakat
Kožny parušalnik administracyjnaha prava maje prava na biaspłatnyja pasłuhi advakata ad momantu zatrymańnia. Fizyčnyja asoby atrymali prava na kasacyju sudovaha rašeńnia, što raniej nie praduhledžvałasia zakonam. Razam z tym, hramadzianie, što pryznajuć svaju vinu pry zatrymańni, mohuć paźbiehnuć sudu i buduć pakaranyja minimalnym štrafam.
Štrafy
Minimalnyja pamiery štrafaŭ, što ciapier buduć nakładacca na fizyčnuju i jurydyčnuju asobaŭ, i na pryvatnaha pradprymalnika, składajuć adpaviedna 0,1, 2 i 10 bazavych adzinak. Maksymalny pamier štrafaŭ składaje 50, 200 dy 1000 b.a. suadnosna. Dla fizyčnych asobaŭ praduhledžany maksymalny pamier štrafu – 500 b.a. za parušeńnie normaŭ pracoŭnaha zaanadaŭstva.
❏
Niezaležnyja eksperty pa‑roznamu aceńvajuć novy KaAP: bolšaść ličyć prahresyŭnym toj momant, što jon skaračaje kolkaść instancyjaŭ, što zajmajucca razboram administracyjnych spravaŭ. Adnak nielha nie adznačyć uzmacnieńnie represiŭnaści novaha kodeksu.
