Alaksandr Łukašenka prapanoŭvaje źnižać staŭku refinansavańnia. Takoje daručeńnie jon daŭ 6 sakavika kiraŭniku Nacyjanalnaha banka Nadziei Jermakovaj, paviedamlaje pres-słužba prezidenta.
Łukašenka adznačyŭ, što ŭ cełym na finansavym rynku Biełarusi składajecca spakojnaja situacyja. «Zrobleny zruchi pa staŭcy refinansavańnia. Heta dobra, tendencyja narmalnaja, i my pierakonvajemsia ŭ tym, jak mnie dakładvaje ŭrad, što heta kroki ŭ pravilnym napramku», — zajaviŭ jon.
Pry hetym jon padkreśliŭ, što «staŭku refinansavańnia treba panižać dla taho, kab ekanomika mahła atrymać bolš tannyja hrošy».
«Jany patrebnyja. Nas žyćcio ŭžo da hetaha padviało», — zajaviŭ Łukašenka.Pavodle jaho słoŭ, pra nieabchodnaść źnižać staŭku refinansavańnia dla pavyšeńnia dastupnaści kredytaŭ zajaŭlajuć i bankiry, «jakija niepasredna pracujuć z realnym siektaram».
Sa svajho boku kiraŭnik Nacbanka adznačyła, što źnižeńnie staŭki refinansavańnia adbyłosia pierš za ŭsio pa pryčynie źnižeńnia inflacyi. Hetamu, pa słovach Jermakovaj, u tym liku spryjała skaračeńnie zališnich hrošaj u abaračeńni, narmalizacyja situacyi na valutnym rynku, naturalnaje źnižeńnie cenaŭ na niekatoryja tavary.
«Viadoma, jość administracyjny resurs, jaki strymlivaje košty. Heta taksama narmalnaja situacyja, bo kožnaja kraina rehuluje tyja ci inšyja ceny, asabliva na sacyjalna značnyja tavary ci pasłuhi», — skazała Jermakova.
Jana adznačyła, što staŭka refinansavańnia pavinna zastavacca stanoŭčaj u paraŭnańni z uzroŭniem inflacyi.
«Rezka źnižać staŭku refinansavańnia my nie budziem», — padkreśliła kiraŭnik Nacbanka.
«My pakidajem za saboj prava, kali raptam niešta źmienicca ŭ cenach abo inflacyi, staŭku refinansavańnia i pavysić. Ale siońnia situacyja składvajecca tak, što jana ruchajecca da panižeńnia», — kanstatavała Jermakova.
Łukašenka daručyŭ kiraŭniku Nacbanka i ŭ dalejšym padtrymlivać stabilnaje funkcyjanavańnie bankaŭskaj sistemy i svoječasova reahavać na roznyja źmieny i tendencyi ŭ hetaj śfiery, paviedamlaje
Zakranajučy pytańnie inflacyi, jon adznačyŭ, što «rynkavaja inflacyja tam, dzie ceny zaležać čysta ad popytu i prapanovy, maje tendencyju da panižeńnia». Pavodle słoŭ Łukašenki, nieabchodna «stabilizavacca na hetym uzroŭni i padciahvać da jaho dachody nasielnictva, i ŭ hetym staŭleńni ŭ nas dobryja tendencyi».
