Chalezin: Čakajem vizitu staršyni KDB u Rym 29

Pra heta siabra arhanizacyi «Free Belarus Now», kiraŭnik «Svabodnaha teatra» Mikałaj Chalezin zajaviŭ padčas anłajn-kanfierencyi na sajcie Radyjo Svaboda, adkazvajučy na pytańnie, jak raźvivajucca ŭ Brytanii spravy z pryciahnieńniem da kryminalnaj adkaznaści Alaksandra Łukašenki.

«Pryciahnieńnie da suda Łukašenki ŭ Brytanii, na žal, mahčyma tolki ŭ tym vypadku, kali jon pierasiače jaje miažu.

Chutčej za usio, hetaha nie adbudziecca, tamu my zajmajemsia siońnia naładžvańniem schiemy pieraśledu Łukašenki i jaho atačeńnia ŭ inšych krainach. Dla hetaha padrychtavana kryminalnaja sprava, materyjały jakoj moža zapatrabavać advakat ź luboj krainy, i zavieści jaje ŭ ramkach svajoj jurysdykcyi. My aprabavali hetuju madel padčas vizitu ministra unutranych spraŭ Kulašova ŭ Lijon — jana pracuje. Kali b nie bojaź francuzskaha ŭrada stvaryć precedent, Kulašova b užo dapytvali ŭ francuzskaj turmie.

Ale — nie atrymałasia ź im, atrymajecca z kimści inšym. Čakajem vizitu staršyni KDB u Rym.

***

Nahadajem, što 28 lutaha prem'jer-ministr Michaił Miaśnikovič padpisaŭ rasparadžeńnie № 84r «Ab kamandziravańni staršyni Kamiteta dziaržbiaśpieki Biełarusi Vadzima Zajcava ŭ Rym». Data i meta pajezdki nieviadomyja. Pres-sakratar KDB Alaksandr Antanovič admoviŭsia paviedamić BiełaPAN jakija-niebudź padrabiaznaści, zajaviŭšy, što «źmiest mierapryjemstvaŭ składaje słužbovyja źviestki».

U pasolstvie Italii ŭ Minsku skazali, što ambasada «nie vydavała vizu hetamu hramadzianinu».

Vadzim Zajcaŭ uklučany ŭ śpis nieŭjaznych u ES biełaruskich čynoŭnikaŭ, adkaznych za parušeńni pravoŭ čałavieka.

Śpis z 158 proźviščaŭ byŭ zaćvierdžany ministrami zamiežnych spraŭ ES 31 studzienia 2011 h. Hetym asobam zabaronieny ŭjezd na terytoryju Jeŭrasajuza.

U studzieni hetaha hoda ministr unutranych spraŭ Biełarusi Anatol Kulašoŭ, jaki taksama znachodzicca ŭ śpisie nieŭjaznych u ES, naviedvaŭ Francyju. Francuzskaja viza była vydadzienaja jamu pa prośbie Interpoła. U pasolstvie Francyi rastłumačyli, što vizavyja sankcyi ES nie dziejničajuć u vypadkach, kali čynoŭniki naviedvajuć mierapryjemstvy mižnarodnych arhanizacyj.