Lidery Partyi kamunistaŭ biełaruskaj Siarhiej Kalakin i Abjadnanaj hramadzianskaj partyi Anatol Labiedźka 5 sakavika zajavili ab mahčymym pieranosie kanhresu demsiłaŭ na bolš poźni termin.
— Kanhres — heta nie vałun, jaki niemahčyma adsunuć, — skazaŭ Labiedźka. — Jaho praviadzieńnie zaležyć ad mnohich faktaraŭ: stupieni padrychtoŭki dakumentaŭ, jakija kanhres pavinien pryniać, arhanizacyjnych pytańniaŭ. Nia ŭsio zaležyć tolki da nas: źmianieńnie daty praviadzieńnia kanhresu mahčymaje, kali ŭłady va ŭsioj Biełarusi nie daduć pamiaškańnia, jakoje nam padydzie.
Palityki stanoŭča rascanili list Alaksandra Milinkieviča na inicyjatyvu lidera Partyi BNF Vincuka Viačorki, jaki zaprapanavaŭ platformu «Kampramisu dziela adzinstva».
— Jość rašeńnie palitrady ab stvareńni pahadžalnaj kamisii, — dadaŭ Labiedźka, — i hetaje rašeńnie pavinna vykonvacca. Kali Milinkievič padaŭ tudy svaju zajavu, my heta vitajem. Adzinaje, čaho b nie chaciełasia — heta novych pretenzijaŭ i novych umovaŭ, jakija spyniać dziejnaść palitrady.
— Kali jość palityčnaja vola i žadańnie znajści kampramis, — zajaviŭ Kalakin, — dyk jon budzie znojdzieny. Prapanovy Milinkieviča my abmiarkujem na palitradzie, jakaja projdzie ŭ nabližejšuju sieradu, 7 sakavika. Taksama na joj buduć razhledžanyja techničnyja pytańni praviadzieńnia kanhresu.
