Staršynia kamisii pa zamiežnych spravach Siejma Łatvii Ojars Kałnynš zajaviŭ, što ES nieabchodna reahavać na parušeńni pravoŭ čałavieka ŭ Biełarusi, adnak, usie hetyja kroki pavinny być dobra pradumanymi i sapraŭdy efiektyŭnymi.
Ad ciapierašniaj abranaj madeli pacierpiać najpierš łatvijskija pradprymalniki, adnak u nijakim razie režym Łukašenki, pieradajuć słovy Kałnynša łatyskija ŚMI.
Svaju pazicyju Kałnynš vykłaŭ padčas narady parłamienckich kamisij pa zamiežnych spravach krainaŭ ES, jakaja prachodziła 11 i 12 sakavika ŭ Kapienhahienie z udziełam ministra zamiežnych spraŭ Danii Vili Seŭndała i viarchoŭnaj pradstaŭnicy ES pa zamiežnych spravach Ketryn Eštan.
«Padčas dyskusij ja zaklikaŭ da restrukturyzacyi ekanamičnych sankcyj, kab jany sapraŭdy pracavali i padšturchoŭvali Łukašenku źmianić svaju palityku, a nie akazvali niehatyŭnaha ŭpłyvu tolki na ekanamičnyja intaresy našaj krainy», — adznačyŭ Kałnynš.
Pavodle słovaŭ staršyni kamisii siejma Łatvii, padčas razmovy z dackim ministram i viarchoŭnaj pradstaŭnicaj ES jon padkreśliŭ, što «nieabchodna rabić usio, kab Biełaruś vyzvaliła palitviaźniaŭ i vykonvała pravy čałavieka». Ciapierašnija ž sankcyi Bruselu, miarkuje Kałnynš, vyhladajuć vielmi vuzkimi, da taho ž «jany nikoli nia buduć pracavać efektyŭna, pakul Minsk budzie mieć padtrymku Maskvy.
