Siońnia i ŭčora na dopyty na spravie niezarehistravanaha «Maładoha frontu» byli vyklikanyja piaciora maładzionaŭ – Kaciaryna Halickaja, Pavał Drazdoŭ, Alena Makarevič, Kaciaryna Krasnova i Aleś Vitkievič. Usich ich vyklikajuć u prakuraturu pa spravie, što była zaviedzienaja 4 lutaha suprać Źmitra Chviedaruka i Aleha Korbana. Śledčyja cikavilisia ŭ maładzionaŭ asabistymi kantaktami z Chviedarukom i Korbanam, a taksama dziejnaściu arhanizacyi. Junakoŭ zvyčajna vyklikajuć na dopyty praz dekanaty navučalnych ustanovaŭ, u jakich jany navučajucca.
Nahadajem, što letaś, kali kryminalnyja spravy ŭ dziejnaści ad imia niezarehistravanaj arhanizacyi byli zaviedzieny na Źmitra Daškieviča, Barysa Hareckaha, Sieržuka Lisičonka i Aleha Korbana, dziasiatki dopytaŭ prajšli pa ŭsioj krainie. Tamu «maładafrontaŭcy» miarkujuć, što na hetym vykliki maładzionaŭ u prakuraturu nia spyniacca. Źmicier Chviedaruk, jaki ŭčora adśviatkavaŭ dzień naradžeńnia, miarkuje, što raniej, čym letam, sudovy praces pa ichniaj spravie nie pačniecca.
«Maładafrontaŭcy» ž pakul rychtujucca da vuličnych akcyjaŭ 25 sakavika. Jak paviedamiŭ Barys Harecki, «Małady front» rychtuje taksama akcyi, jakija buduć papiaredničać Dniu Voli. Tak, «MF» źbirajecca padtrymać pradprymalnikaŭ 12 sakavika, 15 sakavika adznačyć Dzień kanstytucyi, a taksama paŭhodu źniavoleńnia Źmitra Daškieviča. Hetyja daty «maładafrontaŭcy» źbirajucca adznačyć vyviešvańniem nacyjanalnych ściahoŭ, a taksama nievialikimi pikietami i razdačaj ulotak.
Pakul arhkamitet pa śviatkavańni Dnia Voli nia vyznačyŭsia z farmatam praviadzieńnia vuličnych akcyjaŭ, «Małady front» prapanavaŭ svaje varyjanty. Jany prapanoŭvajuć raspačać śviatkavańnie mitynham na Kastryčnickaj płoščy i praciahnuć šeściem na płošču Niezaležnaści. Nieviadoma ci budzie padtrymanaja takaja inicyjatyva «Maładoha frontu» arhkamitetam.
Taksama Barys Harecki paviedamiŭ, što zaraz iduć aktyŭnyja pieramovy z pradprymalnikami, kab jany padtrymali akcyju 25 sakavika. «Niejkija zruchi ŭ hetym pytańni ŭžo majucca», — kaža Barys.
