Hramadskaje abjadnańnie «Biełaruskaja asacyjacyja žurnalistaŭ» adznačaje niaŭchilnaje paharšeńnie situacyi sa svabodaj słova i inšymi
Amal adnačasova adbyvajucca niezakonnaje abmiežavańnie prava na svabodu pieramiaščeńnia siabraŭ arhanizacyi, rezkaje ŭzmacnieńnie pieraśledu žurnalistaŭ z boku prakuratury i KDB, a taksama raspaŭsiud niedakładnaj i źnievažalnaj infarmacyi pra HA «BAŽ» i jaho kiraŭnictva dziaržaŭnym telebačańniem.
Za apošnija niekalki dzion užo čatyrom siabram HA «BAŽ» było admoŭlena ŭ vyjeździe za miežy Biełarusi. Siarod ich — staršynia arhanizacyi Žanna Litvina, jakoj 15 sakavika pamiežnyja słužby nie dazvolili vylecieć z aeraportu
Nivodnaja z aficyjnych struktur nie daje žurnalistam infarmacyi, kim i na jakoj padstavie prymałasia rašeńnie ab časovym abmiežavańni ich prava na vyjezd z krainy. Z anałahičnymi prablemami sutyknuŭsia ŭ hety ž pieryjad šerah hramadskich dziejačoŭ i apazicyjnych palitykaŭ.
Hetyja abmiežavańni naŭprost parušajuć artykuł 30 Kanstytucyi Respubliki Biełaruś, pavodle jakoha hramadzianie krainy majuć prava svabodna pakidać Biełaruś, — hetak ža jak i zakon «Ab paradku vyjezdu z Respubliki Biełaruś i ŭjezdu ŭ Respubliki Biełaruś hramadzianaŭ Respubliki Biełaruś». Abmiežavańnie prava žurnalistaŭ i siabraŭ BAŽ na vyjezd z krainy supiarečyć taksama art.art. 33 i 34 Kanstytucyi krainy, jakija harantujuć hramadzianam svabodu vykazvańnia i svabodu raspaŭsiudu infarmacyi.
Masavyja parušeńni svabody mierkavańnia prajaŭlajucca i ŭ tym, što z pačatku hoda siem žurnalistaŭ z Hrodna i Połacku atrymali vusnyja albo piśmovyja papiaredžańni ad orhanaŭ prakuratury i KDB. Jašče adzin žurnalist z Bresta vyklikany ŭ abłasnuju prakuraturu na 19 sakavika. Taksama vielmi tryvožnymi sihnałami dla žurnalistaŭ stali zatrymańni ŭ apošnija dni ŭ Minsku dźviuch zamiežnych zdymačnych hrup — estonskaj z kanała TV3 3 i šviedskaj z SVT, jakija byli akredytavanyja ŭ krainie.
Nielha nie źviarnuć uvahi na toje, što cisk na žurnalistaŭ i siabraŭ BAŽ pavialičyŭsia nieŭzabavie paśla raspačataj na biełaruskim telebačańni kampanii ckavańnia i dyskredytacyi HA «Biełaruskaja asacyjacyja žurnalistaŭ» i jaje kiraŭnictva. Składvajecca ŭradžańnie, što biełaruskaje dziaržaŭnaje telebačańnie zajmajecca ideałahičnym zabiaśpiačeńniem nastupu na niezaležnuju žurnalistyku ŭ krainie.
U suviazi z vyšejpieraličanymi faktami HA «BAŽ» :
— rašuča pratestuje suprać uviadzieńnia abmiežavańnia žurnalisckaj dziejnaści, pravoŭ i zakonnych intaresaŭ svaich siabraŭ;
— patrabuje, kab Departamient pa hramadzianstvie i mihracyi MUS i Dziaržaŭny pamiežny kamitet adkazali na pytańnie — jakaja dziaržaŭnaja ŭstanova i na jakoj padstavie prymała rašeńnie abmiežavać šerahu hramadzian vyjezd z krainy;
— źviartajecca ŭ Prakuraturu RB z patrabavańniem zrabić zachady pa adnaŭleńni zakonnaści;
— zajaŭlaje, što budzie i nadalej, niezaležna ad cisku na arhanizacyju, ažyćciaŭlać svaju dziejnaść pa ŭstalavańni svabody słova ŭ krainie.
