Pavodle internetnaha vydańnia EUobserver u dadatkovy śpis sankcyj EZ patrapiŭ biełaruski biznesoviec Jury Čyž i «bolšaść» jaho firmaŭ, ale adnu ź ich paškadavali na prośbu Słavienii.
Vystupajučy na pres-kanferencyi 23 sakavika ŭ Bruseli paśla taho, jak Rada zamiežnych spravaŭ EZ abkłała sankcyjami 12 asobaŭ (u tym liku dvuch biełaruskich biznesoŭcaŭ) i 29 kampanij, ministar zamiežnych spravaŭ Francyi Alen Župe, pavodle vydańnia, adznačyŭ, što sankcyi zakranuli bolšaść firmaŭ Čyža «za adnym małym vyklučeńniem adnosna adnoj doččynaj kampanii, tamu što adna kraina-siabra, Słavienija, nie nazyvajučy hetaj kampanii, paprasiła ab vyklučeńni».
Pavodle Euobserver, reč datyčyć kampanii «Elite», jakaja padpisała sa słavienskaj kampanijaj «Riko Group» kantrakt varty pryblizna 100 miljonaŭ eŭra na pabudovu hatelu klasy luks u Miensku.
Kali na asobnaj pres-kanferencyi ŭ Bruseli zapytali ministra zamiežnych spravaŭ Słavienii Karła Erjaŭca, ci dadatkovyja sankcyi, uchvalenyja 23 sakavika, nie datyčać kantraktu pamiž «Elite» i «Riko», jon adkazaŭ: «Nia viedaju».
A dyrektar palityčnaha departamentu ministerstva zamiežnych spravaŭ Słavienii, Matej Marn, skazaŭ vydańniu EUobserver, što Słavienija nikoli nie prasiła nie ŭklučać kampanii «Elite» ŭ śpis sankcyj.
Ale inšyja dyplamaty EZ, jakija pažadali zastacca ananimnymi, skazali vydańniu, što Słavienija padavała hołas u abaronu hetaj kampanii. Adna z hetych ananimnych krynicaŭ dadała, što prośba Słavienii stvaryła «drenny precedent», pakolki i Łatvija taksama paprasiła vyklučyć dźvie biełaruskija kampanii, jakija majuć biznes ź biełaruskimi partnerami, ź planavanaha śpisu sankcyj.
