Ministar zamiežnych spravaŭ Švecyi Karł Bildt skazaŭ u interviju radyjo "Svaboda", što Eŭraźviaz źnimie sankcyi, jakija nakłaŭ na biełaruski režym paśla prezydenckich vybaraŭ u śniežni 2010 hodu, kali buduć vyzvalenyja i reabilitavanyja ŭsie palitviaźni. Ale vyzvaleńnie i reabilitacyja palitviaźniaŭ nia źnimie ŭsich prablemaŭ u dačynieńniach Bruselu ź Mienskam.
Spadar Bildt, ci dumajecie vy, što Ŭschodniaje partnerstva moža sapraŭdy dziejničać bieź Biełarusi, jakaja ŭ im faktyčna nie prysutničała ciaham dvuch apošnich hadoŭ?
Jano moža dziejničać, ale, biezumoŭna, było b lepš, kali b Biełaruś udzielničała ŭ im. Adnak heta zaležyć vyklučna ad Biełarusi, a nie ad nas.
Što tyčycca palitviaźniaŭ u Biełarusi, vy paŭtarajecie, što ŭsie jany pavinny być vyzvalenyja. A što z vašym inšym patrabavańniem ― reabilitacyjaj palitviaźniaŭ? Vy ŭsio jašče hetaha patrabujecie?
Tak, my patrabujem ich vyzvaleńnia i ich reabilitacyi. My zadavolenyja tym, što byli vyzvalenyja Andrej Sańnikaŭ i jaho kaleha. Heta my možam tolki vitać. Ale heta tolki dva palitviaźni. Kali ja razmaŭlaŭ z Andrejem Sańnikavym, jon skazaŭ mnie, što ŭmovy ŭ turmie, miakka kažučy, dalokija ad zadavalniajučych. Tak što jak z palityčnaha, tak i humanitarnaha hledzišča, my budziem ćviorda patrabavać vyzvaleńnia i reabilitacyi palitviaźniaŭ.
Što ministry zamiežnych spravaŭ Eŭraźviazu razumiejuć pad słovam «reabilitacyja»?
Ja nia dumaju, što my davali farmalnaje vyznačeńnie hetamu słovu, ale my napeŭna zdolejem raspaznać, kali takaja reabilitacyja nastupić.
Vy skazali, što havaryli sa spadarom Sańnikavym. Jaki mesydž jon pieradaŭ Eŭraźviazu?
Pa-pieršaje, jon skazaŭ, što jon vielmi ŭdziačny za padtrymku, jakuju jon i inšyja palitviaźni atrymali ad nas. Jon dumaje, što naša pazycyja była adnoj z asnoŭnych pryčynaŭ ― kali nia samaj asnoŭnaj ― taho, što jon ciapier adnosna svabodny, to bok, znachodzicca pa-za turmoju ŭ Biełarusi. Druhi mesydž, jaki my pieradali adzin adnamu, heta toje, što my budziem praciahvać hety palityčny kurs. Heta pytańnie vyzvaleńnia i reabilitacyi ŭsich palityčnych viaźniaŭ. Pakul tak nia staniecca, hety kurs nia źmienicca.
Kali staniecca tak, što ŭsie astatnija palitviaźni buduć vyzvalenyja, dyk ci tady buduć prypynienyja sankcyi?
Kali tak staniecca, kali ŭsie palitviaźni buduć vyzvalenyja, dyk tak, my prypynim sankcyi i vierniemsia da sytuacyi, jakaja była na pačatku śniežnia 2010 hodu. Heta nia značyć, što my źnimiem usie prablemy. Sioleta ŭ Biełarusi buduć parlamenckija vybary. My budziem zaklikać biełaruskija ŭłady, kab jany zaprasili mižnarodnych naziralnikaŭ i praviali hetyja vybary svabodna i spraviadliva. Hetyja patrabavańni zastanucca. Ale ja kažu tut pra sankcyi, jakija źviazanyja z palitviaźniami paśla śniežnia 2010 hodu.
Niekatoryja z ambasadaraŭ Eŭraźviazu viernucca ŭ Miensk na hetym tydni, ale pacichu. Čamu pacichu? Čamu nia budzie nijakich publičnych zajavaŭ na hety kont?
Tamu što heta nie naležyć da našaj palityki. My nikoli nie chacieli adklikać našych ambasadaraŭ ź Miensku. Hetak zrabiŭ spadar Łukašenka, kali jon de fakta vydvaryŭ dvuch našych ambasadaraŭ. Siarod nas isnuje pryncyp salidarnaści, i tamu my adklikali ŭsich našych ambasadaraŭ. Ale rašeńnie ŭ hetaj spravie ciapier nie na našym baku, a na baku Łukašenki. Jon pavinien dazvolić viarnucca ŭsim našym ambasadaram. My chočam, kab jany viarnulisia. Heta była jaho inicyjatyva, kab jany byli adklikanyja.
Ci vy kantaktavali sa Švedzkaj chakiejnaj federacyjaj u suviazi z sustrečaj Mižnarodnaj chakiejnaj federacyi ŭ nastupnym miesiacy i pytańniem chakiejnaha čempijanatu ŭ Biełarusi ŭ 2014 hodzie?
Nie, ja nie kantaktavaŭ. Ja dumaju, što hetaje pytańnie treba pakinuć vyklučna im. Ja dumaju, što jany viedajuć našu dumku, i ja dumaju, što jany viedajuć sytuacyju ŭ Biełarusi. Jany prymuć svajo ŭłasnaje rašeńnie.
Kali ničoha nia zdarycca ŭ Biełarusi, dyk vy budziecie za toje, kab čempijanat śvietu pa chakiei adbyŭsia ŭ hetaj krainie?
Mnie nikoli nie chaciełasia davać palityčnyja parady roznym spartovym federacyjam na śviecie adnosna taho, što im treba rabić. Ja dumaju, što jany adznačyli, što my ― Rada zamiežnych spravaŭ EZ ― vykazali ŭ minułym miesiacy svaju zakłapočanaść hetym kankretnym pytańniem.
