Maci pakaranaha śmierciu Uładzisłava Kavalova napisała na imia načalnika śledčaha izalatara KDB skarhu z patrabavańniem viarnuć joj zapisy syna. Skarha adpraŭlena 30 krasavika pa pošcie zakaznym listom z paviedamleńniem.
Jak skazała Luboŭ Kavalova, paśla vykanańnia śmiarotnaha pryhavoru ŭ dačynieńni da jaje syna jana atrymała pa pošcie ź SIZA KDB pakiet ź jaho asabistymi rečami. Adnak žoŭtaja papka, ź jakoj Uładzisłaŭ chadziŭ na pasiadžeńni suda, akazałasia pustoj. «Z hetaj papkaj jon byŭ na sudzie, tam znachodzilisia zapisy, zroblenyja im padčas suda i paśla, kali jany z advakatam znajomilisia z sudovaj spravaj dla napisańnia kasacyjnaj skarhi. Uład vielmi prasiŭ, kab hetyja zapisy zachavali», — adznačyła Luboŭ Kavalova.
Jana miarkuje, što ŭ zapisach syna mahli zhadvacca niejkija parušeńni va ŭtrymańni ŭ SIZA, i tamu ich kanfiskavali.«Ale ja nie atrymała nijakich dakumientaŭ ab tym, naprykład, što zapisy syna byli źniščanyja ŭ zakonnym paradku. Moža, ich chtości vykraŭ? Niachaj administracyja SIZA KDB raźbirajecca i daść mnie adkaz», — zajaviła žančyna.
Kavalova adznačyła, što pa zakonie adkaz na skarhu pavinien być dadzieny na praciahu 15 dzion, adnak jana nie ŭpeŭniena, što atrymaje taki adkaz. «U SIZA KDB i raniej ihnaravali maje skarhi, — skazała maci pakaranaha. — Ja niekalki razoŭ źviartałasia nakont zhublenych davieranaściej, jakija syn składaŭ, kab ja mahła dziejničać ad jaho imia. Dvojčy składalisia davieranaści, i dvojčy jany źnikali, kali ich pavinna było zaśviedčyć kiraŭnictva SIZA KDB. Kali davieranaści ŭžo byli nie patrebnyja, ja atrymała farmalnuju adpisku ab tym, što davieranaść moža zaśviedčyć zvyčajny nataryus».
Pavodle słoŭ Lubovi Kavalovaj, kali jana nie atrymaje adkazu na svaju skarhu, to budzie źviartacca ŭ inšyja instancyi, u tym liku ŭ Hienieralnuju prakuraturu.
***
Uładzisłaŭ Kavaloŭ i hałoŭny padazrony pa spravie ab terakcie Dźmitryj Kanavałaŭ byli pryhavoranyja da vyšejšaj miery pakarańnia Viarchoŭnym sudom Biełarusi 30 listapada 2011 hoda. Kavaloŭ svajoj viny nie pryznaŭ i źviarnuŭsia za pamiłavańniem da Łukašenki, jaki ŭ pamiłavańni admoviŭ. U siaredzinie sakavika śmiarotnyja pryhavory byli pryviedzienyja ŭ vykanańnie, niahledziačy na toje, što skarha Kavalova na pryhavor była zarehistravana ŭ Kamitecie pa pravach čałavieka AAN, a nahladnaja skarha nie razhladałasia Viarchoŭnym sudom.
