Hrodzienskija lekary vyratavali 14-hadovuju Alisu, paciarpiełuju ad prapielera deltapłana, piša «Hrodzienskaja praŭda».
U kastryčniku 2011 hoda ŭ vioscy Hrodzienskaha rajona ad łopaściaŭ deltapłana paciarpieła dzicia. Baćka Alisy paprasiŭ žychara vioski, u jakoha byŭ latalny aparat, prakacić dačku. Spačatku dziaŭčynka ŭbačyła probny palot. Kali deltapłan pryziamliŭsia, Alisa kinułasia zajmać miesca. Łopaść šruba ŭdaryła jaje pa hałavie. Udar byŭ takoj siły, što na hałavie dziaŭčynki złamaŭsia šlem. Alisa atrymała ciažkuju čerapna-mazhavuju traŭmu.
Ź minimalnymi šancami na žyćcio dziaŭčynka trapiła ŭ balnicu chutkaj miedycynskaj dapamohi. Na ščaście, apynułasia ŭ rukach daśviedčanaha lekara-niejrachirurha Andreja Švieda. Z udziełam zahadčyka niejrachirurhičnaha adździaleńnia Aleha Dziamieščyka ŭ apieracyjnaj ranu ačyścili, vydalili niežyćciazdolnyja tkanki, hiematomu. Heta zaniało kala troch hadzin! Vyratavańnie praciahnuli ŭ adździaleńni aniestezijałohii i reanimacyi pad kantrolem zahadčyka adździaleńniem Piatra Hierasimčyka.
Praz vosiem dzion dziaŭčynka stała prychodzić u siabie. Jašče praz tydzień jaje pieraviali ŭ niejrachirurhičnaje adździaleńnie. Znoŭku vučyli jeści, mycca, sadzicca.
Praź miesiac paśla apieracyi Alisa ŭžo mahła chadzić. Dziaŭčynku vypisali biez surjoznych nieŭrałahičnych defiektaŭ: jana razmaŭlaje, čytaje, piša, chodzić ... Siońnia jana praktyčna zdarovaja, vučycca ŭ doma. U budučyni joj treba budzie płastyčnaja apieracyja.
