Knižku Baradulina na prezientacyi sprabavali parvać 6

«Nam treba było ładzić imprezu na hanku», — takimi słovami pačaŭ paet Michaś Skobła prezientacyju knihi Siarhieja Šaprana «Try miachi dziadźki Ryhora, albo Sam-nasam z Baradulinym», jakaja vyjšła ŭ sieryi «Kniharnia «Naša Niva». Sabrałasia kala 50 čałaviek — kolki zmahło ŭmiaścić nievialikaje pamiaškańnie minskaj kniharni «Łohvinaŭ». Navat «imianińnik» — Siarhiej Šapran — ścipła stajaŭ, sastupiŭšy miesca kamuści z haściej.

Na imprezie byli hości čakanyja i niečakanyja. Pra Baradulina kazali jaho siabry Hienadź Buraŭkin i Uładzimir Niaklajeŭ.

Maleńkaj siensacyjaj stała źjaŭleńnie pierakładčyka i byłoha staršyni finskaha PEN-centra Juka Maliniena,

jaki koliś uładkavaŭ pobyt Vasila Bykava ŭ Chielsinki. Jon skazaŭ niamała ciopłych słovaŭ i pra «Ryhorja» Baradulina, adšukaŭšy ŭ jaho paezii paŭnočnuju finskuju strunu.

«Šapran na roŭnych havaryŭ z Baradulinym», —

zaŭvažyŭ Hienadź Buraŭkin, daŭni siabra-adnakašnik dziadźki Ryhora. Jon pryznaŭsia, što, pračytaŭšy knihu, nanoŭ adkryŭ dla siabie niekatoryja epizody baradulinskaj bijahrafii. Spadar Hienadź panarakaŭ, što kniha sklejenaja, a nie sšytaja, a značyć bolš uraźlivaja da pierahortvańniaŭ i pierahinańniaŭ. U abaronu vydaŭcoŭ vystupiŭ Michaś Skobła, jaki pasprabavaŭ knižku žartam parvać, kab dakazać jaje jakaść. Jaho spynili.

Redaktar NN Andrej Skurko adznačyŭ, što

kniha vartaja taho, kab za prava jaje vydać bilisia najbujniejšyja dziaržaŭnyja vydaviectvy.

«Jany ad jaje adbivalisia», — sumna pažartavaŭ Hienadź Buraŭkin.

Uładzimir Niaklajeŭ, paryvista pryciskajučy ruku da serca, dziakavaŭ Siarhieju Šapranu. Paet zhadvaŭ, jak u svoj čas pačynaŭ zapisvać uspaminy aktrysy Łarysy Aleksandroŭskaj, adnak taja praca nie była zavieršanaja.

Fiksacyja ŭspaminaŭ — niaprostaja sprava, adnak dapamahaje dakranucca da unikalnaj historyi.

Nie abminuli ŭ časie hutarki i Karatkieviča, jaki pryśviaciŭ Baradulinu «Ładździu rospačy».

«Kali b Hiervasij Vylivacha pisaŭ vieršy, jany byli b takimi, jak u Baradulina», —

kazaŭ Michaś Skobła, padkreślivajučy žyćcieśćviardžalnaść paezii dziadźki Ryhora.

Pieśniu «Drobnieńki doždžyk» z taje apovieści, a taksama pieśni na vieršy Baradulina, cudoŭna praśpiavała pad hitaru Taćciana Matafonava.

Vydańnie možna nabyć u kniharni «Łohvinaŭ» (pr. Niezaležnaści, 37a), chutka jano trapić u inšyja kniharni i da niezaležnych raspaŭsiudnikaŭ.

IN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH