Siońnia ŭ Rasii majuć prajści tradycyjnyja niadzielnyja akcyi apazicyi, jakija pačalisia paśla prezidenckich vybaraŭ. Hetym razam siłavyja struktury reahujuć na ich bolš žorstka.
Adna ź lidaraŭ pieciarburhskaj apazicyi Volha Kurnosava była aryštavanaja za niekalki chvilin da pačatku akcyi «Kantrolny špacyr».
«Supracoŭniki palicyi nie patłumačyli, pa jakoj mienavita pryčynie zroblenaje zatrymańnie. Jany tolki pacikavilisia tym, jak mianie zavuć, i adrazu ž zatrymali», — raspaviała Kurnosava žurnalistam.
Aktyvistka trymała ŭ rukach niekalki dziesiatkaŭ biełych šaroŭ, da jaje padyšli supracoŭniki palicyi i prapanavali dziaŭčynie prajści ŭ palicejski aŭtamabil, piša Hazieta.ru.
Na Isakijeŭskaha płoščy pačynajuć źbiracca apazicyjaniery, jakija płanujuć pravieści ŭ centry Pieciarburha čarhovy «Kantrolny špacyr». U časie akcyi aktyvisty płanujuć mirnym šeściem prajści da płoščy Mastactvaŭ.
Raniej stała viadoma ab zatrymańni siońnia pieciarburhskich apazicyjanieraŭ na płoščy Mastactvaŭ, dzie raźmiaściŭsia łahier apazicyi paśla taho, jak na Isakijeŭskaha płoščy pačalisia ramontnyja raboty i aktyvistam pryjšłosia jaje pakinuć. Apazicyjanieraŭ źvinavacili ŭ tym, što jany śmiecili.
U Maskvie siońnia taksama byli zatrymańni. Palicyja ŭziała Piatra Ivančykava, arhanizatara dazvolenaha mitynha partyi «Jabłoko» na Puškinskaj płoščy. Udzielniki itynha pratestujuć suprać zakonaprajekta, jaki ŭzmacniaje adkaznaść za parušeńnie praviłaŭ praviadzieńnia mitynhaŭ. Padstavaj dla zatrymańnia stała toje, što ludzi «razmaŭlali nie pa zajaŭlenaj temie», paviedamlaje Newsru.com. U stalicy Rasii siońnia płanujecca jašče adna pratestnaja akcyja — «Biełaje defile» pa Krasnaj płoščy.
