U Minsku pad adkrytym niebam — vystava Šahała 1

Na płoščy imia Jakuba Kołasa ŭ Minsku 7 červienia adkryjecca vystava repradukcyj rabot Marka Šahała «Mastak i horad», pryśviečanaja 125-hodździu z dnia jaho naradžeńnia.

Jak paviedamiła 30 červienia na pres-kanfierencyi ŭ Minsku dyrektar Muzieja sučasnaha vyjaŭlenčaha mastactva Natalla Šaranhovič, u vystavie pad adkrytym niebam buduć vystaŭleny repradukcyi 19 karcin mastaka, jakija znachodziacca ŭ Dziaržaŭnaj Traćciakoŭskaj halerei ŭ Maskvie, Dziaržaŭnym Ruskim muziei ŭ Sankt-Pieciarburhu i Muziei Marka Šahała ŭ Viciebsku. Usie hetyja raboty mastak stvaryŭ jašče da adjezdu ź Biełarusi ŭ Francyju.

Pavodle jaje słoŭ, farmat vystavy źjaŭlajecca dla Biełarusi dastatkova novym. «Kali letaś my praviali na płoščy vystavu biełaruska-polskaha płakata, my ŭbačyli, nakolki ŭ hetym vypadku ŭ ludziej mianiajecca razumieńnie mastactva», — skazała Šaranhovič.

Usiaho na płoščy budzie vystaŭlena dzieviać stendaŭ, na adnym ź jakich budzie raźmieščana bijahrafija Šahała i jaho partret, a na astatnich — repradukcyi karcin z podpisami i tłumačeńniami na čatyroch movach — ruskaj, biełaruskaj, anhlijskaj i francuzskaj.

Na vystavie raboty Šahała buduć pakazany ŭ pavialičanym maštabie, što zrobić ich, na dumku dyrektara muzieja, bolš efiektnymi. «Heta dapamoža lubomu čałavieku zaŭvažyć raboty Šahała, padyści, razhledzieć ich i pačytać, što napisana na stendach», — zaznačyła Šaranhovič.

Dla stvareńnia jakasnych repradukcyj karcin u pavialičanym maštabie arhanizataram daviałosia admovicca ad z samaha pačatku nievialikich pa pamiery rabot mastaka. «My pakinuli raboty, jakija buduć sapraŭdy dobra vyhladać u prastory płoščy, pakolki Šahał — muziejny mastak», — zaznačyła na pres-kanfierencyi ekśpiert Kamiteta Marka Šahała mastactvaznaŭca Tamara Karandašava.

«U repradukcyi žyvapis vielmi ciažka pakazać tak, jak jana padajecca ŭ aryhinale, — važna zachavać koler, pieradać žyvy ruch pendźla, kab repradukcyi nie vyhladali płakatami», — rastłumačyła jana.

Vystava «Mastak i horad» budzie pracavać na praciahu troch miesiacaŭ.

Taksama ŭ miežach prajekta ŭ stalicy projduć dziciačyja plenery, vystava sučasnych mastakoŭ, natchnionych rabotami Šahała, adbudziecca adkryćcio dziciačaj art-halerei i budzie prezientavany śpiektakl ab žyćci i tvorčaści mastaka «Anioł Šahał nad dachami».

Prajekt realizujecca mižnarodnym sacyjalna-ekanamičnym fondam «Ideja» pry padtrymcy pasolstva Francyi ŭ Biełarusi.

Anastasija Sałanovič, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH