Pavodle "Interfaksu", siońnia ŭ Miensku narešcie budzie padpisanaje šmatpakutnaje handlovaje pahadnieńnie miž Biełaruśsiu i Rasiejaj. Chacia nie pavieru da kanca, pakul toje nie adbudziecca de-fakta.
Try dni tamu u Maskvie ŭžo byli sabranyja na ŭračystuju cyrymoniju žurnalisty, ale ŭ vyniku pačuvalisia, jak chto-kolviek z vymytaj šyjaj :)
Eksperty patłumačyli sutnaść spravy tak: naš urad baicca ekspansii rasiejskaha tavaru. Tamu ŭžyvajecca taktyka zaciahvańnia času dy vyhandloŭvańnia choć drobnych sastupak.
Dadamo: navat kali papieru padpišuć, Maskvie rana budzie ličyć, što partnery-supierniki kapitulavali.
Bo dziela volnaha dostupu rasiejskaj pradukcyi na tutejšy rynak, jak zaznačałasia, treba skasavać niekalki dziasiatkaŭ narmatyŭnych aktaŭ, pryniatych biełaruskim uradam dy prezydentam. Sami razumiejecie, što hety praces taksama moža stacca nadta viazkim...
Jak i praces stvareńnia sumiesnaha pradpryjemstva na bazie "Biełtranshazu".
Dyj uvohule ŭvieś siužet intehracyjnaj sahi składajecca ź biaskoncych damovaŭ, jakija potym pad roznaj markaj nie vykonvajucca. Bo nasamreč intaresy kožnaha z bakoŭ ad samaha pačatku byli dalokija ad patetyčnych lozunhaŭ "bratniaj intehracyi".
Toje, što naš urad sprabuje zaraz niejak adkrucicca ad niavyhadnych umoŭ, nakinutych rasiejskim bokam u vyniku naftahazavaj vajny, pa-svojmu zrazumieła. Ale adna reč, kali čas, vyjhrany takoj partyzanskaj taktykaj, budzie skarystany dziela ekanamičnaj pierabudovy. Ale ž ci nia voźmie vierch niedalnabačnaja palityka kanservacyi status-kvo?
Zrešty, navat kali b va ŭradzie byli spres refarmatary — apošniaje słova nie za imi.
Tym časam — zaŭvažyli? — rasiejskija kampanii adna za adnoj admaŭlajucca ad pastavak nafty na davalnickaj padstavie. Kažuć: niavyhadna!
Dyk voś, naš ekanamist Leanid Zaika śćviardžaje: usio nia tak prosta. A mienavita: z boku rasiejcaŭ maje miesca hulnia z palityčnaj matyvacyjaj. Na dumku Zaiki, jany naŭmysna viaduć spravu da bankrutstva našych NPZ, kab potym tańniej ich kupić. Pryčym rej viadzie Kreml, jaki navažyŭsia zmusić Łukašenku da patrebnych rasiejskamu kiraŭnictvu rašeńniaŭ. Sa słoŭ ekanamista, tut intaresy aliharchaŭ i Kramla supadajuć.
Voś vam i "dačynieńni haspadarčych subjektaŭ"! Muchi z katletami ŭsio adno ŭ adnoj talercy. I toj, chto razvažaje, što ŭ stasunkach ź Biełaruśsiu Maskvoju ruchaje nibyta čystaja luboŭ da rynku, miakka kažučy, idealizuje sytuacyju.
Darečy, siońnia rasiejski premjer Fradkoŭ prylataje ŭ Miensk, vidavočna, nia tolki dziela rytualnaha pasiedžańnia saŭminu sajuznaj dziaržavy. Značna bolej surjoznaj moža być razmova z Łukašenkam, pra imaviernaść jakoj paviedamlajuć maskoŭskija medyi.
