Pryjom prajektaŭ na konkurs daŭno skončyŭsia, a arhanizatary praciahvajuć atrymlivać pracy, paviedamlaje dziaržaŭnaje telebačańnie. My vyrašyli pravieryć, što ŭjaŭlajuć ź siabie «najlepšyja inavacyjnyja idei ŭ roznych śfierach sacyjalnaha i ekanamičnaha raźvićcia krainy».
«Ałkahalizacyja hramadstva»
Siarod sotni prajektaŭ pryciahvajuć uvahu vostryja temy. «Ałkahalizacyja hramadstva dasiahnuła pahroźlivych maštabaŭ. (…) Asablivuju tryvohu vyklikaje ŭzmacnieńnie hetaj źjavy siarod moładzi», — piša adzin z aŭtaraŭ.Jon prapanuje kompleks adukacyjna-prafiłaktyčnych mierapryjemstvaŭ dla školnikaŭ i studentaŭ.
Aŭtarka prajekta «Fond dapamohi maładym mamam» kanstatuje kiepskaje demahrafičnaje stanovišča ŭ krainie. Jana miarkuje, što najaŭnych dziaržaŭnych prahram padtrymki maładych baćkoŭ niedastatkova i prapanuje stvaryć admysłovy fond. Jon dapamoža maładoj mamie adšukać pracu z hnutkim hrafikam. Pracadaŭca, jaki voźmie na pracu takuju supracoŭnicu, atrymaje padatkovyja lhoty.
Jašče adzin aŭtar kaža pra nieabchodnaść refarmavańnia sistemy achovy zdaroŭja, u pryvatnaści — uvieści abaviazkovaje miedycynskaje strachavańnie. Za prykład jon prapanuje ŭziać dośvied Izraila.
Eŭryka?
Niekatoryja aŭtary addali pieravahu mienš hłabalnym prablemam. Ale drobnaje — nie značyć horšaje. Tak, adzin z prajektaŭ pryśviečany vyroščvańniu hryba-viasiołki. Jaje aŭtar, bijachimik, zajmajecca daśledavańniem viasiołki jak mocnaha srodku dla lačeńnia cukrovaha dyjabietu.
Studenty Biełaruskaha dziar-žaŭnaha ŭniviersiteta transpartu ŭnieśli niekalki prapanovaŭ. Jany stvaryli ekśpierymientalny ekzemplar pieranosnaha prystasavańnia dla siłkavańnia mabilnaha telefona. Jaho možna nasić z saboj i vykarystoŭvać pry patrebie ŭ lubym miescy. Mahčyma, hetaje niachitraje vynachodnictva zrobić revalucyju.
Akramia taho, studenty VNU prapanujuć arhanizavać kampjutarnyja kursy dla pažyłych ludziej. Heta nadaść im upeŭnienaści ŭ sabie i dapamoža zrazumieć, čym žyvuć ich dzieci i ŭnuki.
Trochi pudłaŭ
Pad niaŭdałaj nazvaj «Hienacyd habrejskaha naroda» chavajecca prajekt pa ŭviekaviečvańni pamiaci achviar nacyzmu na Kobrynščynie.
A voś fotazdymak achoplenaha ahniom haraža. Heta prajekt pa znosie pryvatnych haražoŭ i pabudovie padziemnych haražnych kaapieratyvaŭ. Zastajecca spadziavacca, što jon nie praduhledžvaje takich radykalnych mietadaŭ vyrašeńnia pieršaj zadačy.
Aŭtar z Homiela prapanuje ŭkaranić šerah inavacyj dla pryciahnieńnia zamiežnych turystaŭ u svoj horad. Prapanuje zrabić nadpisy pa-anhlijsku, stvaryć sietku suvienirnych kramaŭ, a taksama vyrašyć nabalełaje pytańnie hramadskich prybiralniaŭ. Idei razumnyja, ale naŭrad ci hetyja daŭnija zdabytki cyvilizacyi možna nazvać inavacyjnymi.
Što takoje «100 idej dla Biełarusi»
U konkursie piać naminacyj: «Hramadska-patryjatyčnaje vychavańnie moładzi», «Ekanamičnyja inicyjatyvy», «Siamja — asnova sučasnaha hramadstva», «Farmavańnie zdarovaha ładu žyćcia» i «Ekałohija i enierhaźbieražeńnie». Prajekty źmieščanyja na sajcie BRSM. Aŭtaraŭ-pieramožcaŭ zaprosiać na Respublikanski moładzievy inavacyjny forum.
