Kavalenka nie raźličvaje na amnistyju

Viciebski aktyvist Kansiervatyŭna-chryścijanskaj partyi — BNF Siarhiej Kavalenka, jaki znachodzicca ŭ mahiloŭskaj kałonii № 19, nie raźličvaje na toje, što da jaho budzie prymieniena amnistyja.

Pra heta BiełaPAN paviedamiła jaho žonka Alena Kavalenka.

Pavodle jaje słoŭ, 14 červienia jana naviedała Siarhieja ŭ kałonii. «Sustreča doŭžyłasia dźvie hadziny ŭ prysutnaści supracoŭnicy kałonii. Siarhiej skazaŭ, što na amnistyju jon nie raźličvaje. Da taho ž usiaho za tydzień znachodžańnia ŭ atradzie jamu ŭžo paśpieli „prylapić“ adno parušeńnie režymu adbyvańnia pakarańnia. Nibyta jon u nienaležny čas lažaŭ na łožku. Adnak ab tym, što jość „naležny“ i „nienaležny“ čas, Siarhiej navat nie viedaŭ», — skazała žonka asudžanaha.

Jak adznačyła Alena, Siarhiej adčuvaje na siabie pilnuju ŭvahu z boku kiraŭnictva kałonii.

«Naprykład, jak tolki jaho pieraviali ŭ atrad, načalnik atrada skazaŭ jamu, kab jon nie razmaŭlaŭ ź inšymi źniavolenymi na palityčnyja temy i nie zajmaŭsia ahitacyjaj. Akramia taho, u jaho ŭvažliva praviarajuć tumbačku na pradmiet lišnich rečaŭ», — paviedamiła Kavalenka.

«Siarhieja pa-raniejšamu niepakojać piečań i nyrki. Pavodle vynikaŭ abśledavańnia ŭ jaho byŭ vyjaŭleny hiepatoz piečani. Jak mnie skazali ŭračy, kali jaho nie lačyć, to jon moža pryvieści da cyrozu. Tym nie mienš leki, jakija ja pryviezła, u mianie nie ŭziali, u tym liku preparaty kalcyju i mahniju. Siońnia Siarhiej pavinien mnie patelefanavać i pradyktavać śpis lekaŭ, jakija jamu dazvoleny», — skazała žonka źniavolenaha.

Jana adznačyła, što jaje muž adčuvaje vostry niedachop kalcyju,

«navat rybu, kali jaje dajuć u kałonii, jon jeść z kaściami». Kavalenka taksama paviedamiŭ žoncy, što ŭ adzieńni ciapier važyć 69 kiłahramaŭ.

***

Siarhiej Kavalenka byŭ zatrymany 19 śniežnia 2011 hoda pavodle abvinavačańnia va ŭchileńni ad adbyvańnia pakarańnia ŭ vyhladzie abmiežavańnia voli (art. 415 KK). Havorka idzie pra pakarańnie, jakoje było vyniesiena apazicyjanieru ŭ mai 2010 hoda za vyviešvańnie bieł-čyrvona-biełaha ściaha na hałoŭnaj navahodniaj jołcy Viciebska. U lutym hetaha hoda Kavalenku asudzili na dva hady i adzin miesiac pazbaŭleńnia voli ŭ kałonii ahulnaha režymu. Adrazu paśla zatrymańnia jon abviaściŭ haładoŭku pratestu, jakaja doŭžyłasia ź nievialikimi pierapynkami prykładna dva miesiacy.

18 maja Viciebski abłasny sud admoviŭsia zadavolić kasacyjnuju skarhu Siarhieja Kavalenki na prysud. U mahiloŭskuju kałoniju apazicyjanier byŭ etapavany 19 maja.

Siarhiej Pulša, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH