Jak paviedamiŭ BiełaPAN kaardynatar akcyi «Sałaŭinyja viečary ŭ Minsku» Rusłan Šajkin, lepš za inšych sałaviej śpiavaŭ u mikrarajonie Drazdy na levym bierazie Śvisłačy. Jaho pieśnia składajecca z 12 kalen — cełasnych kupletaŭ. Kaardynatar akcyi paviedamiŭ, što maksimalna mahčymuju kolkaść kalen u pieśni hałasistaha sałaŭja, ź jakim jon sustrakaŭja ŭ śpiecyjalnaj litaratury, — 20–30, adnak u Minsku takich sałaŭjoŭ nie čuli. Jak padkreśliŭ Šajkin, majsterstva słuchać sałaŭjoŭ u sučasnym śviecie ŭ mnohim stračana, śpiecyjalistaŭ, jakija mohuć acanić pieśniu ptuški, — «ličanyja adzinki».
APB taksama skłała «Sałaŭinuju kartu» Minska 2012 hoda. Usiaho sioleta ŭ stalicy vyjaŭlena bolš jak 300 miescaŭ pražyvańnia sałaŭjoŭ. Bolš za ŭsio hałasistych ptušak u mikrarajonach Drazdy i Miadźviežyna, u bataničnym sadzie, zakaźniku «Labiažy», u niekatorych miescach Łošyckaha parku. Zaraz sałaŭi zakančvajuć śpiavak i aktyŭna zajmajucca vykormlivańniem ptušaniat.
Jak zaznačyŭ Šajkin, u nastupnym hodzie akcyju «Sałaŭinyja viečary ŭ Minsku» pa vyznačeńni lepšaha śpievaka i składańnia sałaŭinaj karty stalicy płanujecca pačać raniej — nie ŭ kancy maja, a ŭ pačatku, kali sałaŭi śpiavajuć asabliva achvotna.
Śpiecyjalisty vyznačajuć lepšaha śpievaka pa kolkaści i pa jakaści vykanańnia asobnych kalen — cełasnych kupletaŭ ź pieśni. Čym bolš kalen i čym jany čyściejšyja, tym lepšym ličycca ptušyny śpiavak.
