Pra heta BiełaPAN paviedamiła namieśnik staršyni arhanizacyi Nasta Pałažanka.
Pavodle jaje słoŭ, upieršyniu Daškievič pieraviedzieny ŭ atrad. «Z času pačatku adbyćcia pakarańnia Daškievič nie vychodziŭ sa štrafnych izalataraŭ i pamiaškańniaŭ kamiernaha typu. Spačatku tak adbyłosia ŭ kałonii № 9 u Horkach. Jaho źmiaščali ŭ ŠIZA raz za razam — za toje, što jon patrabavaŭ narmalnych umoŭ utrymańnia. Jamu tam navat pryjšłosia abjavić haładoŭku, paśla čaho jon byŭ pieraviedzieny ŭ hłybockuju kałoniju», — skazała Pałažanka.
U kałonii ŭ Hłybokim Daškieviča pavodle jaho zajavy ab pahrozie žyćciu i zdaroŭju spačatku trymali ŭ adzinočnaj kamiery, potym źmiaścili ŭ štrafny izalatar, zatym — u pamiaškańnie kamiernaha typu, pradoŭžyła Pałažanka.
«Takim čynam, za paŭtara hoda Daškievič upieršyniu znachodzicca chacia b na adnosnaj voli, maje mahčymaść pahladzieć na nieba nad hałavoj», — skazała jana.
Pałažanka adznačyła, što Daškievič, zhodna z praviłami kałonii, pavinien pracavać: «Adnak nam pakul nieviadoma, u jaki atrad jon pieraviedzieny i kim jon pracuje».
***
Źmicier Daškievič razam z aktyvistam «Maładoha frontu» Eduardam Łobavym byŭ zatrymany ŭ Minsku za dzień da prezidenckich vybaraŭ, 18 śniežnia 2010 hoda. Hetaje zatrymańnie pradstaŭniki apazicyi i pravaabaroncy rascanili jak previentyŭnuju mieru milicyi napiaredadni vybaraŭ. Maładyja ludzi byli pryznany vinavatymi ŭ źbivańni dvuch minčan. 24 sakavika 2011 hoda sud pryhavaryŭ Daškieviča da dvuch hadoŭ pazbaŭleńnia voli ŭ kałonii ahulnaha režymu. U vieraśni jamu prapanoŭvali napisać prašeńnie ab pamiłavańni, ale jon admoviŭsia.