Hienerały, jakija kirujuć Birmaj, upieršyniu pakazali novuju stalicu krainy, što da hetaha času zastavałsia začynienaj dla zamiežnikaŭ. Heta Najpiida — albo Siadziba Karaloŭ, za 460 km na poŭnač ad staroj stalicy Ranhunu.
Žurnalisty byli zaprošanyja ŭ novuju stalicu na parad z nahody Dnia ŭzbrojenych siłaŭ. Horad nazvali miražom u džunhlach. U stalicy biednaj Birmy, adnoj z najbolš adstałych krainaŭ śvietu, jany ŭbačyli šyrokija bulvary, bliskučyja ŭradavyja budynki i vaśmipałosnuju aŭtastradu. Čynoŭniki, jakija mieściacca ŭ elehantnych rezydencyjach, narakajuć, adnak, na niedachop kramaŭ i zabavaŭ.
Paŭtara hodu tamu vajskovaja chunta ŭpotaj pakinuła Ranhun. Chunta nibyta bajałasia amerykanskaj ataki i ličyła, što Ranhun niedastatkova biaśpiečny (u historyi Birmy stalicy źmianialisia šmat razoŭ taksama i tamu, što tak raili astrolahi).
Na ŭčarašnim paradzie pakazaŭsia redki na publicy hość — numar 1 chunty hienerał Tan Šve. Jon zaklikaŭ žaŭnieraŭ zachoŭvać pilnaść adnosna tych, chto choča asłabić krainu — heta namiok na amerykanski i eŭrapiejski nacisk, kab vajskoŭcy praviali demakratyčnyja reformy.
