Novyja źviestki z Bahušeŭskaha abłasnoha špitala dla chvorych na suchoty atrymała kaardynatarka arhkamitetu pa stvareńni partyi BCHD Taciana Sieviaryniec.
Jana apaviała, što
ŭžo treci dzień haładuje pacyjent špitala Mikałaj Takarovič, jaki takim čynam vykazvaje niazhodu z tamtejšymi metadami lekavańnia:
«Pra heta mnie paviedamiŭ praz telefon naš prychilnik Valery Hančarenka. Jon taksama pacyjent bahušeŭskaha špitala, chranična chvory na suchoty. Jak i bolšaść tamtejšych pacyjentaŭ, jon musić pravodzić u špitali šmat času, i takija chvoryja traplajuć u vialikuju zaležnaść ad administracyi, asabliva kali ŭ ich niama rodnych, kab za ich zastupilisia. Spadar Hančarenka kaža, što ŭčora jaho vyklikała hałoŭurač Natalla Lasnaja, zajaviŭšy, što heta jon padbuchtorščyk haładoŭki pratestu. I pryhraziła, što abodvuch pieraviadzie ŭ miascovaje psychijatryčnaje adździaleńnie, kali jany nie pierastanuć pieradavać źviestki sa špitala ŭ niezaležnyja ŚMI».
Niekalki dzion tamu list chvoraha na suchoty Mikałaja Takaroviča byŭ raźmieščany na sajcie BCHD. U im havaryłasia, što charčavańnie ŭ Bahušeŭskim špitali drennaje, a metady lekavańnia i preparaty — sastarełyja.
Naprykancy minułaha hodu pra toje samaje niezaležnym žurnalistam kazaŭ i Valery Hančarenka, jaki taksama tady abviaściŭ haładoŭku pratestu.
Paśla hetaha Hančarenku nasamreč pieraviali ŭ psychijatryčnaje adździaleńnie, dzie trymali niekalki miesiacaŭ.Aficyjnaj pryčynaj pieravodu było nazvana psychičnaje zachvorvańnie. U inšych pacyjentaŭ u toj samy čas pazabirali mabilnyja telefony, pazbaviŭšy mažlivaści vychodzić u internet, i navat ałoŭki dy papieru.
