Kapela «Pete‑Paff» daje solny kancert u klubie «Hrafici». «My hrajem nievialičkija kancerciki ŭ nievialičkich klubach, kab nie hublać formu i hladzieć na reakcyju słuchačoŭ na našu tvorčaść», — kaža Pit Paŭłaŭ, jaki abiacaje, što 2 krasavika słuchačy pačujuć liryčnyja matyvy raźvitańnia ź zimoju i haračyja tancavalnyja rytmy sustrečy ź viasnoj...
Prajekt Pete‑Paff pačynaŭsia litaralna z troch muzykaŭ. Zaraz jon pieraros u sapraŭdny arkiestar. Miesiac tamu hurt prezentavaŭ svoj pieršy albom, jaki nazyvajecca «Pahłybleńnie». Kožny dzień prynosiŭ novyja idei i pryciahvaŭ ŭ kamandu ŭsio novych i novych talenavitych udzielnikaŭ. Akramia lidera kapeły Pete‑Paff Pita Paŭłava, nad płytaj pracavali kalarytnyja persanažy biełaruskaje muzyčnaje sceny: Andrej Saponienka, Jaraš Mališeŭski, Alezis Dziemidovič i inš.
«My ŭsie vielmi doŭha čakali , kali nadydzie čas dla stałaj kancertnaj dziejnaści majho muzyčnaha dziciaci, — raspaviadaje Pit Paŭłaŭ. — Na praciahu ŭsich troch hadoŭ emocyi aburvali mianie. Tamu, adbyŭsia naš pieršy vialiki kancert ŭ miežach Biełarusi, u mianie amal nie zastałosia słovaŭ, kab raspavieści pra svajo adčuvańnie hetaha momantu... Napeŭna, uźnikaje pytańnie, čamu za try hady isnavańnia Pete‑Paff nie adyhraŭ u Biełarusi nivodnaha vialikaha kancertu. Prosta my žadali zrabić jaho ŭžo na padstavie čahości kankretnaha, dakładniej — vydadzienaj płytki. My hrajem nievialičkija kancerciki ŭ nievialičkich klubach, kab nie hublać formu i hladzieć na reakcyju słuchačoŭ na našu tvorčaść.»
Kapelu Pete‑Paff vielmi ciopła prymali ŭ Polščy i Niamieččynie, dzie muzyki ŭžo adyhrali šerah kancertaŭ. Polskija dy hiermanskija pradusary nie adnojčy zaŭvažali, što ŭ paraŭnańni z astatnimi kalektyvami Pete‑Paff sapraŭdy «irvie» aŭdytoryju! Zaraz narešcie i ŭ biełaruskich słuchačoŭ jość mahčymaść pasłuchać, pahladzieć i adčuć, jak abcasy sami saboj pačynajuć pastukvać ab padłohu ŭ rytmie jaskravych kampazycyj Pete‑Paff.
