Kab uratavacca ad haračyni, rabočyja apranali zmočanuju ŭ chałodnaj vadzie vopratku.
U lipieni ŭ cechach fiksavałasia niebiaśpiečnaja tempieratura.
Rabočyja cechaŭ № 6, 7 i 12 zapatrabavali dapłaty za škodnyja ŭmovy pracy ŭ lipieni. Ich patrabavańni sfarmulavaŭ u liście da dyrektara pradpryjemstva Mikałaja Kačanoŭskaha staršynia zavodskaj arhanizacyi Svabodnaha prafsajuza Viktar Stukaŭ.
U liście havorycca, što ŭ minułym miesiacy ŭ šerahu cechaŭ tempieraturnyja pakazčyki značna pieravyšali dapuščalnyja sanitarnyja normy. U jakaści paćviardžeńnia na sajcie prafsajuza vykładzienyja fota zamieraŭ tempieratury, jakaje siahaje 40 hradusaŭ.
Staršynia prafsajuza nahadvaje, što ŭ takich vypadkach Zakon ab achovie pracy daje prava rabočym admovicca ad daručanaj pracy «ŭ vypadku ŭźniknieńnia niepasrednaj niebiaśpieki dla žyćcia i zdaroŭja» da taho času, pakul niebiaśpieka nie budzie likvidavanaja. Ale nichto z rabočych ad pracy nie admoviŭsia.
Viktar Stukaŭ nazyvaje pavodziny rabočych hieraičnymi i vartymi adpaviednaj apłaty. Ad imia prafsajuza jon prapanuje kiraŭnictvu «Połack-Škłovałakno» zrabić dapłatu rabotnikam cechaŭ № 6, 7, 12 «za pracu pry tempieraturach, što značna pieravyšajuć sanitarnyja normy za lipień miesiac u pamiery 50% da rascenkach za vypuščanuju pradukcyju».
Jak paviedamiŭ «Našaj Nivie» Viktar Stukaŭ, na siońnia rabočyja atrymali nadbaŭki ŭ pamiery kala 22% da rascenkach za vypuščanuju pradukcyju. Ale ci stała heta vynikam aktyŭnaści prafsajuza jon dakładna nie viedaje.
Pa jaho słovach, padobnyja situacyi ŭ cechach zdarajucca kožnaje leta, a dapłaty pačali rabić tolki ŭ hetym hodzie. «Prablema ŭ tym, što mnohija nie viedajuć, što rabić u padobnych vypadkach. U lipieni my zrabili zamiery tempieratury ŭ cechach, skłali adpaviednyja akty. Pieravyšeńnie sanitarnych normaŭ fiksavałasia na praciahu troch tydniaŭ miesiaca», — raskazvaje Viktar Stukaŭ.
Pa słovach staršyni prafsajuza, siaredni zarobak pa pradpryjemstvie składaje kala 4 miljonaŭ rubloŭ.
Atrymać aficyjny kamientar z boku dyrekcyi «Połack-Škłovałakno» na momant publikacyi nie ŭdałosia.
