Vystupaje dyrektar celułozna-kardonnaha kambinata Jury Kruk.
17 žniŭnia ŭ Śvietłahorsku miascovy rajvykankam ładziŭ schod haradžanaŭ dla hramadskaha abmierkavańnia ŭździejańnia na navakolnaje asiarodździe novaha chimičnaha pradpryjemstva — zavoda bielenaj sulfatnaj celułozy. Jaho źbirajucca pabudavać pobač ź isnujučym celułozna-kardonnym kambinatam. Adnak na schodzie nivodnamu pradstaŭniku hramadskaści słova nie dali — navat tym, chto zapisaŭsia na vystup. Pryniali tolki zapiski.
Nieabyjakavyja da novaha chimičnaha pradpryjemstva haradžanie jašče da pačatku słuchańnia kazali pra mabilizavanych asobaŭ pry pasadach — i ad pradpryjemstvaŭ, i ad arhanizacyj.
Taciana: «Tut, u zale, u asnoŭnym siadziać ideałahičnyja rabotniki pradpryjemstvaŭ, siaredniaj ruki načalniki, tak možna skazać. Voś baču načalnikaŭ adździełaŭ „Chimvałakna“, pracaŭnikoŭ celułozna-kardonnaha kambinata, kamunhasa — ad kožnaha pradpryjemstva. Dumaju, što ŭłady zrobiać tak, jak jany chočuć. Jany cisnuć na narod i nie źviartajuć uvahi na mierkavańnie ludziej».
Viadoŭca schodu, namieśnik staršyni rajvykankama i kiraŭnik rajvykankamaŭskaj kamisii ŭ praviadzieńni hramadskich słuchańniaŭ Siarhiej Miarkułaŭ papiaredziŭ hramadu: «Usie pytańni, jakija padrychtavany zahadzia i jakija ŭźniknuć padčas našaj pracy, u piśmovym vyhladzie pieradajcie ŭ sakrataryjat schodu.
Repliki, sproby zadavać pytańni z zały prymacca nie buduć — zahadzia vas papiaredžvaju ad imia kamisii».
Zvyš hadziny času zaniała prezentacyja prajektu i aficyjnaja acenka ŭździejańnia novaj chimičnaj vytvorčaści na ekałohiju horada i pryharadnaj vioski Jakimava Słabada.Dakładali pra heta dyrektar celułozna-kardonnaha kambinata Jury Kruk, zahadčyca kafiedry chimičnaj pierapracoŭki draŭniny Biełaruskaha techničnaha ŭniversiteta Natalla Čornaja, zahadčyk siektara riespublikanskaha navukova-daśledčaha centra «Ekałohija» Alaksandr Dziamidaŭ.
Lejtmatyvam ich vystupaŭ stała ŭsiebakovaje ŭchvaleńnie prajekta: 400 tysiač ton bielenaj celułozy ŭ hod, sulfatny sposab jaje adbielvańnia biez vykarystańnia malekularnaha chłoru, ekspart pradukcy za miažu, 501 miljon dalaraŭ ZŠA hadavoj vyručki, 500 novych pracoŭnych miescaŭ — i nibyta nijakaj škody dla ekałohii, dla zdaroŭja ludziej.A što ŭ horadzie admoŭnaja demahrafičnaja situacyja, vysokaja śmiarotnaść, rost zachvorvańniaŭ — dyk heta ahulnaja tendencyja i ŭ rehijonie, i ŭ krainie ŭ cełym. Prynamsi, tak dakładaŭ spadar Dziamidaŭ z centra «Ekałohija»:
«Śvietłahorski rajon — sapraŭdy idzie rost kolkaści zachvorvańniaŭ. Ale takaja tendencyja charakternaja praktyčna dla ŭsich rajonaŭ Homielskaj vobłaści i nie tolki Homielskaj vobłaści». Dyrektar kardonnaha kambinata spadar Kruk źjedliva dadaŭ: «A pra ŚNID, pra pjanstva zabylisia?»
Niekatoryja prysutnyja, u tym liku chimik-bijołah pa adukacyi Vadzim Bołbas, sprabavali atrymać słova dla vystupu, ale viadoŭca Miarkułaŭ spasyłaŭsia na rehłamient i zaćvierdžanuju Saŭminam praceduru hramadskich słuchańniaŭ. Schod zharnuli navat raniej ad zapłanavanaha času.
Prezydyum, u jakim siadzieli staršynia rajvykankama Siarhiej Maksimienka, namieśnik staršyni Homielskaha abłvykankama Balasłaŭ Pirštuk, namieśnik ministra Minpryrody Vital Kulik, pakinuŭ zału praz bakavy vychad.
I tut mnohija haradžanie, aburanyja takim hramadskim słuchańniem, abstupili doktara techničnych navuk Natallu Čornuju, dyrektara centra «Ekałohija» Valera Klučanoviča, pradstaŭnikoŭ rajvykankama, kab vykazać svaje pretenzii: «Nas zapisali na vystupleńni — a čamu nie dali słova? Čamu ludziam nie dali pytańni zadać? Vyklikajcie siudy Miarkułava! A ludziej navošta zapisvali vystupać?»
Žycharka Jakimavaj Słabady:
«Poŭnaściu ihnarujuć mierkavańni žycharoŭ Jakimavaj Słabady, jakija faktyčna buduć zakładnikami hetaha pradpryjemstva,kali nie daj boh jaho pabudujuć. Sa studzienia pa siońniašni dzień, kali byli pieršyja — tak by mović, papiarednija — hramadskija słuchańni, nikoha nie možam daklikacca, pryvabić nijakimi pirahami — nivodnaha supracoŭnika dziaržaŭnych ŚMI, nivodnaha načalnika. Usie abjazdžajuć Jakimavu Słabadu».
Podpisy jak byccam pa-za hramadskimi słuchańniami.Miascovyja ŭłady navat nia zhadvajuć ciapier pra 10 tysiač podpisaŭ, jakija sabrany ŭ horadzie suprać budaŭnictva jašče adnaho chimičnaha pradpryjemstva j nakiravanyja ŭ Administracyju prezidenta, Saŭmin i ambasadu Kitaja, na čyj kredyt źbirajucca budavać u Śvietłahorsku zavod bielenaj celułozy.
Hramadski aktyvist i adzin ź inicyjataraŭ zboru podpisaŭ suprać budaŭnictva novaha chimičnaha pradpryjemstva Telman Maślukoŭ dadaje: «Faktyčna adbyłosia nie hramadskaje abmierkavańnie, a prosta prezientacyja taho, što źbirajucca budavać. I što samaje hałoŭnaje — pavodle pałažeńnia pra hramadskaje abmierkavańnie, zaćvierdžanaje Saŭminam, my nie možam navat vystavić niejkich pretenzijaŭ da ŭładaŭ, bo vystupy ŭdzielnikaŭ schodu ŭ im nie praduhledžanyja.
Drenna toje, što navat pa aficyjnych źviestkach, jakija ŭklučany ŭ spravazdaču, acenki ŭździejańnia na navakolnaje asiarodździe, kolkaść škodnych rečyvaŭ, što vykidajucca ŭ Śvietłahorsku ŭ atmaśfieru, paśla ŭviadzieńnia novaha zavoda pavialičycca ŭ 10 razoŭ.Nielha ŭsie chimičnyja vytvorčaści źbirać u adnym horadzie!»
