U ZŠA kolkaść ludziej, jakija zarazilisia tak zvanym «virusam Zachodniaha Niła», za apošni tydzień pavialičyłasia bolš čym na 60%. Pra heta paviedamili pradstaŭniki Ministerstva achovy zdaroŭja ZŠA.
Pavodle dadzienych amierykanskaha centra pa kantroli i prafiłaktycy zachvorvańniaŭ, u hetym hodzie było zarehistravana 1118 vypadkaŭ hetaha zachvorvańnia, bolš za sorak čałaviek pamierli.
Tolki za apošni tydzień zachvareli kala 700 čałaviek i pamierli 36.
Fiedieralnyja ŭłady pastaŭlenyja ŭ tupik imklivym raspaŭsiudžvańniem hetaj chvaroby. Bolš za pałovu chvorych u hetym hodzie — žychary Techasa, adnak ciapier «virus Zachodniaha Niła» znojdzieny ŭ 47 štatach, u 38 ź ich heta zachvorvańnie zarehistravana ŭ ludziej.
Va Uschodniaj Jeŭropie taksama virus imkliva raspaŭsiudžvajecca. Naprykład, u Rasii ŭ Vałhahradskaj vobłaści znachodzicca kala 100 čałaviek z padobnym dyjahnazam, dvoje ŭžo pamierli.
Pieranosčykami virusu źjaŭlajucca kamary, a taksama ptuški i hryzuny. Lichamanka Zachodniaha Niła maje vyraznuju siezonnaść — z červienia pa kastryčnik, kali ŭmovy dla raspaŭsiudu kamaroŭ najbolš spryjalnyja. Upieršyniu virus lichamanki Zachodniaha Niła byŭ znojdzieny va Uhandzie ŭ kryvi chvoraj žančyny ŭ 1937 h.
