Biełaruskaja delehacyja biare ŭdzieł u samicie Ruchu niedałučeńnia ŭ Tehieranie (Iran). Uznačalvaje delehacyju novy ministr zamiežnych spraŭ Uładzimir Makiej, pryznačany na hetuju pasadu 20 žniŭnia.
Pavodle infarmacyi pres-słužby MZS Biełarusi, asnoŭnaja častka XVI samitu dziaržaŭ — udzielnic Ruchu niedałučeńnia projdzie 30–31 žniŭnia. Hałoŭnaj metaj mierapryjemstva stanie abmierkavańnie najbolš aktualnych mižnarodnych prablem i pryniaćcie vynikovaha dakumienta forumu. «U prajekt vynikovaha dakumienta sustrečy płanujecca ŭklučeńnie šerahu prapanoŭ Biełarusi, što hruntujucca na pryjarytetnych zadačach biełaruskaj delehacyi ŭ AAN (ab pryznańni raznastajnaści šlachoŭ prahresiŭnaha raźvićcia, ab stvareńni hłabalnych partniorstvaŭ, ab umacavańni ŭzajemadziejańnia RN z suśvietnymi centrami siły, ab baraćbie z handlem ludźmi, ab inicyjatyvie pra moładź, ab krainach ź siarednim uzroŭniem dachodu, ab stvareńni hłabalnaha miechanizma pieradačy technałohij novych i ŭznaŭlanych krynic enierhii)», — paviedamili ŭ MZS.
Makiej vystupić na plenarnym pasiadžeńni samitu i praviadzie sustrečy z kiraŭnikami šerahu delehacyj «u metach abmierkavańnia aktualnych dla Biełarusi pytańniaŭ dvuchbakovych adnosin».
Na papiarednim samicie Ruchu niedałučeńnia, jaki prachodziŭ u lipieni 2009 hoda ŭ Jehipcie, ad Biełarusi taksama ŭdzielničaŭ ministr zamiežnych spraŭ — Siarhiej Martynaŭ.
Na ciapierašni samit prezident Irana Machmud Achmadziniežad zaprašaŭ pryjechać Alaksandra Łukašenku.
Kiraŭnik biełaruskaj dziaržavy ŭdzielničaŭ u pracy Havanskaha samitu Ruchu niedałučeńnia ŭ vieraśni 2006 hoda. Tady jon zaklikaŭ niedałučanyja krainy ŭzmacnić ekanamičny i palityčny składalniki ruchu, pierabudavać jaho arhanizacyjnuju strukturu z ulikam pryncypaŭ AAN i vypracavać vyraznuju prahramu dziejańniaŭ pa farmiravańni šmatpalarnaha śvietu.
***
Ruch niedałučeńnia sfarmiravaŭsia ŭ druhoj pałovie 1950-ch — pačatku 1960-ch hadoŭ ź liku krain, jakija vyjšli sa składu jeŭrapiejskich kałanijalnych impieryj, ale nie žadali dałučacca da vajenna-palityčnych sajuzaŭ, na čale jakich stajali SSSR i ZŠA. Zaraz heta niefarmalnaje abjadnańnie dziaržaŭ Azii, Afryki i Łacinskaj Amieryki, udzielnikami ruchu źjaŭlajucca 118 krain.
Biełaruś stała vykazvać cikavaść da hetaj arhanizacyi ŭ druhoj pałovie 1990-ch hadoŭ. U toj čas udzieł u ruchu razhladaŭsia ŭ jakaści svojeasablivaj źniešniepalityčnaj alternatyvy supracoŭnictvu ź dziaržavami Zachadu, adnosiny ź jakimi mocna sapsavalisia ŭ 1996 hodzie. U vieraśni 1997 hoda Biełaruś atrymała status naziralnika ŭ Ruchu niedałučeńnia, a praz hod, u vieraśni 1998-ha, na samicie ŭ Durbanie (PAR) stała jaho paŭnapraŭnym udzielnikam. U 2004 hodzie, paśla dałučeńnia Malty i Kipra da Jeŭrasajuza, Biełaruś zastałasia adzinym udzielnikam Ruchu niedałučeńnia ŭ Jeŭropie.
BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
