Vytvorca prahramy FinSpy, kampanija Gamma, harantuje klijentam, što taja dazvolić im mieć dostup da čužoj elektronnaj pošty, čataŭ, pieramovaŭ pa skajpie, dublavać zapisy z veb-kameraŭ i mikrafonaŭ, zachoŭvać ŭsiu infarmacyju z klavijatury i pry hetym abychodzić 40 antyvirusnych systemaŭ.
Sioleta ŭ traŭni amerykanskija kamputarnyja daśledčyki Morhan Markiz-Buar i Bił Marčak vyrašyli praanalizavać padazronyja elektronnyja listy, jakija pryjšli trom bachrejnskim demakratyčnym aktyvistam. Jany pabačyli, što ŭ paviedamleńniach utrymlivałasia špijonskaja prahrama, jakaja miełasia pieradavać infarmacyju na adzin i toj ža server u Bachrejnie.
Paśla publikacyi hetaj infarmacyi daśledčyki stali atrymoŭvać inšyja ŭzory špijonskich prahramaŭ ad svaich kalehaŭ i ad internet-aktyvistaŭ, jakija padazravali, što za imi sočać.U niekatorych vypadkach, hetyja prahramy mielisia pieradavać infarmacyju na sajty, jakija naležać kampanii Gamma, a niekatoryja viali na servery, jakija mieli dačynieńnie da represiŭnych uradaŭ. Markiz-Buar kaža, što server u Turkmenistanie pakazvaŭ šerah IP-adrasoŭ, jakija naležali Ministerstvu kamunikacyjaŭ. Heta byŭ jasny dokaz, što urad vykarystoŭvaje špijonskuju prahramu na svajoj kamputarnaj systemie.
Pravaabarončaja arhanizacyja Human Right Watch niadaŭna nazvała Turkmenistan «adnoj z najbolš represiŭnych krainaŭ śvietu», u jakoj dysydenty znachodziacca pad niaspynnaj pahrozaj uradavaha pieraśledu.
Letaś u sakaviku udzielniki pratestaŭ u Ehipcie, zachapiŭšy budynak słužby biaśpieki, znajšli tam dakument, jaki śviedčyŭ, što kampanija Gamma prapanoŭvała prahramu FinSpy režymu Chośni Mubaraka za 287 tysiač eŭra ci 353 tysiačy dalaraŭ. Nieviadoma ci adbyŭsia prodaž prahramy ŭ hetym vypadku.
Taksama nieviadoma, ci kuplali hetuju prahramu inšyja represiŭnyja ŭrady, u tym liku biełaruski.
Vykanaŭčy dyrektar kampanii Gamma Marcin Miunch kaža, što kampanija nie nazyvaje svaich klijentaŭ. U elektronnym liście dla International Herald Tribune Miunch napisaŭ, što Gamma pradaje prahramnaje zabieśpiačeńnie ŭradam vyklučna dla kryminalnych raśśledavańniaŭ, i jaho najčaściej vykarystoŭvajuć «suprać pedafiłaŭ, terarystaŭ, arhanizavanaj złačynnaści, vykradańniaŭ ludziej i handlu ludźmi».
Jeva Halperyn, aktyvistka bazavanaj ŭ San-Francyska hrupy za svabodu ŭ Internecie Electronic Frontier Foundation, kaža: «Kali vy pradajacie [takoje prahramnaje zabieśpiačeńnie] krainie, dzie jeść viaršenstva zakonu, dyk mahčyma jaho buduć vykarystoŭvać dla achovy pravaparadku.
Kali vy pradajacie jaho krainie, dzie ź viaršenstvam zakonu prablemy, dyk jaho skarystajuć, kab sačyć za žurnalistami i dysydentami».
