U vioscy Śniadzin Pietrykaŭskaha rajona začyniajecca škoła. U jaje chadzili dzieci ź niekalkich navakolnych viosak, usiaho šeść vučniaŭ. U adździele adukacyi rajvykankama kažuć, što zaraz jany buduć vučycca ŭ Pietrykavie ŭ škole-internacie. Sprava ŭ tym, što ŭsie vučni pachodziać ź nienadziejnych siemjaŭ. Rašeńnie pra pieravod u internat prymała admysłovaja kamisija.
Situacyja sa škołaj u Pietrykaŭskim rajonie vyłučajecca tolki sacyjalnym statusam jaje vučniaŭ, u cełym ža zakryćcio viaskovych škoł u Biełarusi — daŭno nie navina. Samaje znakavaje zakryćcio hoda — škoła ŭ Białaručach Łahojskaha rajona, u jakoj niekali vučyŭsia Janka Kupała. Pryčyna zakryćcia ŭsiudy adnolkavaja — demahrafija.
U rajonach ciapier zvyčajnaja sprava, kali aŭtobus źbiraje ź dziasiatka viosak dziaciej u škołu adnaho z ahraharadkoŭ.
Pa infarmacyi hramadskaha abjadnańnia «Tavarystva biełaruskaj škoły», štohod u Biełarusi začyniajecca kala 100 škoł. U hetym hodzie spyniać pracu 114. U Tavarystvie bjuć tryvohu, što bolšaść začynienych škoł — biełaruskamoŭnyja. Vučniaŭ pieravodziać u rasiejskamoŭnyja škoły, što faktyčna aznačaje stratu moŭnaj pierajemnaści.
Ci ŭnikalny vypadak Biełarusi siarod susiedziaŭ?
U Rasii, dzie viaskovaje nasielnictva taksama imkliva skaračajecca, situacyja padobnaja. Pa źviestkach kamiteta pa adukacyi Dziarždumy, z 1995 pa 2011 začyniłasia bolš za 20000 škołaŭ. Tut dziejničaje padobny pryncyp: škoła začyniajecca — vučni pierachodziać u susiedniuju.
Va Ukrainie pytańnie viaskovych škoł taksama staić vostra. Za apošnija 20 hadoŭ tut było začyniena kala 2000 škoł. Na siońnia ŭ parłamient Ukrainy ŭniesieny na razhlad zakonaprajekt, jaki praduhledžvaje źmianšeńnie minimalnaj kolkaści vučniaŭ u kłasach viaskovych škoł z 5 da 3. Pa dumku aŭtaraŭ prajektu, heta dazvolić zachavać škoły.
U Litvie škoły začyniajucca z-za naturalnaha skaračeńnia nasielnictva, a taksama za košt emihracyjnych pracesaŭ. U apošni čas u Litvie źnikaje pryblizna kala dziesiaci škoł u hod. Jak i ŭ Biełarusi, vučni začynienych škoł pierachodziać vučycca ŭ susiednija.
Šviecyja pieražyła masavaje zakryćcio viaskovych škoł u 70-ch. Heta vyklikała pratesty z boku školnikaŭ, ich baćkoŭ i nastaŭnikaŭ. Dachodziła da samavolnaha zachopu začynienych budynkaŭ i niesankcyjanavanaj vučoby. Ciapier uzbujnieńnie škołaŭ praciahvajecca, vučniaŭ padvoziać na aŭtobusach. U miescach ź nievysokaj kancentracyjaj nasielnictva dziejničajuć škoły-internaty.
