Zhodna z rašeńniem Savieta ministraŭ № 795 ad 29 žniŭnia, ekspartnaja pošlina na syruju naftu pavialičana z 336,6 da 393,8 dołara za 1 tonu.
Adzinaja staŭka ekspartnaj pošliny na śvietłyja i ciomnyja naftapradukty (akramia bienzinu), jakaja z 1 kastryčnika 2011 hoda ŭnifikavana na ŭzroŭni 66% pošliny na naftu, ciapier składaje 259,9 dołara za tonu (raniej — 222,1 dołara).
Takaja ž pošlina ŭstanoŭlena na bienzoł, tałuoł, ksiłoły.
Na tavarnyja bienziny i pramahonny bienzin staŭka vyvaznych mytnych pošlin, zychodziačy z kaeficyjenta 0,9, ciapier składaje 354,4 dołara za tonu zamiest 302,9.
Pošlina na prapan, butany, etylen, prapilen, butylen i butadyjen, inšyja zvadkavanyja hazy vyrasła z 68,9 da 76,2 dołara.
Treba adznačyć, što z maja 2012 hoda Biełaruś śledam za Rasijaj štomiesiac źnižała ekspartnyja pošliny na naftu i naftapradukty.
Z 1 kastryčnika 2011 hoda Biełaruś śledam za Rasijaj ažyćciaŭlaje raźlik ekspartnych pošlin na naftu i naftapradukty pa formule "60/66". Havorka idzie ab pradukcyi, jakaja vyvozicca z terytoryi krainy za miežy mytnaj terytoryi Mytnaha sajuza. Formuła raźliku padrazumiavaje, što staŭka ekspartnych pošlin na śvietłyja i ciomnyja naftapradukty ŭnifikujecca i raźličvajecca z kaeficyjentam 0,66 (66%) ad staŭki pošliny na naftu. Adnačasova z 1 kastryčnika ekspartnaja pošlina na naftu była źnižana šlacham skaračeńnia pracenta ad roźnicy pamiž canoj manitorynhu nafty i canoj adsiačeńnia z 65% da 60%. Pry hetym kaeficyjent raźliku staŭki pošliny na bienziny składaje 0,90 (90%).
Z 2011 hoda Biełaruś impartuje rasijskuju naftu biaspošlinna, ale pieraličvaje ŭ biudžet Rasii vyvaznyja mytnyja pošliny na naftapradukty, vyrablenyja z hetaj vuhlevadarodnaj syraviny i pradadzienyja ŭ trecija krainy. Ekspartnyja pošliny ad prodažu nafty ŭłasnaj zdabyčy (kala 1,7 młn. t u hod) kraina zaličvaje ŭ svoj biudžet. Za studzień—lipień 2012 hoda Biełaruś pieraličyła ŭ biudžet Rasii 2,4 młrd. dołaraŭ vyvaznych mytnych pošlin na naftapradukty, atrymanyja z rasijskaj nafty. Za 2011 hod hetaja suma skłała 3,07 młrd. dołaraŭ.
