Biełaruś dasłała Litvie niekalki prośbaŭ ab akazańni pravavoj dapamohi ŭ suviazi sa źbiehłyam u minułym hodzie ŭ Litvu biełaruskim vajskoŭcam Ściapanam Zacharčankam. Hetuju infarmacyju BNS 4 vieraśnia paćvierdziła Hienieralnaja prakuratura Litvy.
«My atrymali niekalki zajavak ab akazańni pravavoj dapamohi. Adna atrymana jašče ŭ minułym hodzie», — skazała BNS pradstaŭnik Hienprakuratury Ryta Stundzienie, paviedamlaje Delfi.
Raniej «Biełaruski partyzan» paviedamiŭ, što
Hod tamu małodšy siaržant roty hłybinnaj vyviedki śpiecnaza Minabarony Biełarusi źbieh, jak jon śćviardžaŭ, ad źbićcia i ździekaŭ aficeraŭ i dabraŭsia da Vilni (lipień 2011).
«Apošniaj kroplaj, jakaja pierapoŭniła majo ciarpieńnie, i padšturchnuła mianie pakinuć častku i biehčy ŭ Litvu, hety schod siaržanckaha składu. Siaržantaŭ bataljona vyviedki sabrali i zampalit razdaŭ nam papieru, u jakoj było napisana, što ŭ vypadku, kali siły MUS nie buduć spraŭlacca z masavymi pratestami z boku nasielnictva, to my biarem na siabie abaviazacielstva vykanać luby zahad prezidenta i adkryć ahoń pa hramadzianam krainy, jakija pahražajuć kanstytucyjnamu ładu Biełarusi. Niešta takoje było napisana, dasłoŭna ciapier ciažka ŭspomnić», — śćviardžaŭ u intervju «Biełaruskamu partyzanu» Zacharčanka.
U žniŭni 2011 h. Ministerstva abarony Biełarusi raspaŭsiudziła pres-reliz, što pa fakcie samavolnaha pakidańnia Zacharčankam 27 lipienia 2011 h. adnoj z vajskovych častak Minskaha harnizona raspačata kryminalnaja sprava.
U pres-relizie, u pryvatnaści, kazałasia nastupnaje: "Padčas vyvučeńnia akaličnaściaŭ učynieńnia złačynstva ŭstanoŭlena, što Zacharčanka charaktaryzavaŭsia niehatyŭna. Jašče da pryzyvu ŭ armiju nieadnarazova pryciahvaŭsia da administracyjnaj adkaznaści, u tym liku za chulihanstva i raśpivańnie śpirtnych napojaŭ u hramadskim miescy.
Svaimi kalehami Zacharčanka charaktaryzujecca jak «hultajavaty, chitry i krucielavaty čałaviek, schilny da zmanu i parušeńnia dyscypliny, jaki ŭvieś čas šukaje vyhadu i kanfliktuje z tymi, chto jaho akružaje».U pieryjad prachodžańnia słužby nieadnarazova sprabavaŭ uchilicca ad vykanańnia svaich abaviazkaŭ šlacham šmatlikich nieabhruntavanych skarhaŭ na stan zdaroŭja.
Sioleta [2011] vajskoviec bolš za 15 raz źviartaŭsia pa miedycynskuju dapamohu i pravioŭ amal dva miesiacy na stacyjanarnym lačeńni. Ale zachvorvańni nie paćvierdzilisia:u hałoŭnym vajennym miedycynskim kliničnym centry było praviedziena adpaviednaje abśledavańnie, i Zacharčanka byŭ pryznany absalutna zdarovym i zdolnym da słužby.
Znachodziačysia na abśledavańni, jon śviadoma ŭchilaŭsia ad praviadzieńnia miedycynskich pracedur, imknuŭsia zaciahnuć čas svajho znachodžańnia ŭ miedustanovie".
