Stvaralnik humarystyčnaha internet-prajektu "Biełaruskaja žaba" Majk kaža, što praca nad im — srodak źniaćcia stresu: “Namaluješ kolki “žabaŭ” paśla pracy — adrazu spakajnieješ”.
Jahony sajt jość lideram pa naviedvalnaści ŭ raździele “Humar” ličylnika “Akavita”. Žarty ź “Biełžaby” adrazu ž stanoviacca hitami internetaŭskaj subkultury. Apošni hit — “Hałasujem za intelekt!”: čałaviek, padobny na ciapierašniaha prezydenta, adkłaŭšy falijant “V.Bykaŭ. Vieršy”, zadumliva schiliŭsia nad knihaj memuaraŭ “F.Skaryna. Moj Picier”.
Asnoŭnaja tema dla “fotaździekaŭ” — hulnia sa słohanam “Za Biełaruś”. Na hety kont na “Biełžabie” možna znajści dziasiatki malunkaŭ: ad lakaničnaha “ZAdrał” da trapnaha “Za taho, chto płocić” z vyjavaju ŭdzielnikaŭ ahitkancertaŭ.
Śpiarša Majk stvaraŭ kalažy samastojna, ale potym zaniaŭsia zboram malunkaŭ u internecie. Ciapier sajt nazyvajuć “žabaschoviščam” — čym bližej da vybaraŭ, tym čaściej davodzicca adnaŭlacca. “Škada, što prajekt zanadta palityzavany. Chaciełasia b stvarać žaby i na inšyja temy, — pryznajecca Majk. — Ale ja razumieju, što heta reakcyja ludziej na tuju kolkaść idealahičnaj biazhłuździcy, jakaja vylivajecca dziaržavaj”. Tamu Majk pakul pazycyjanuje prajekt jak “chulihanski sposab pratestu suprać abałvańvańnia nasielnictva”. Kaža, kali ŭ krainie ŭsio źmienicca da lepšaha — adrazu pamianiaje hidki čyrvona-zialony dyzajn sajtu. “Pry źmienie ŭłady “Žaba” tolki vyjhraje — tady źjavicca raznastajnaść siarod hierojaŭ. Pakul ža daminuje tolki adzin”.
Malunki z prajektu “Biełžaba” uvojduć ŭ CD-prajekt, jaki rychtuje hramadzkaja inicyjatyva “Treci šlach” razam ź pieśniami prajektu “UltraVožyk” i fłeš-multfilmami Aleha Miniča.
❏
«Žaba» na kamputarnym słenhu — satyryčny kalaž, apracavany z dapamohaj hrafičnych redaktaraŭ. Sajt maje admysłova niazručna abranaje rašeńnie koleraŭ. «Naš dyzajn moža pakazacca hidkim tolki pradažnym apazycyjaneram, bo jon uvabraŭ u siabie kolery našaha rodnaha ściahu!» — tłumačać na hałoŭnaj staroncy stvaralniki.
