Bałatujecca Anatol Labiedźka ŭ Staravilenskaj akruzie Minska №105.
Jamu procistajali dziejny deputat Mikałaj Samasiejka, kandydat ad partyi BNF Jaŭhien Rybakoŭ i siabra ŁDP Maksim Soncaŭ.
Pad čas debataŭ na telekanale Biełaruś-2 kandydat u deputaty Anatol Labiedźka paprasiŭ svajho apanenta, kandydata Mikałaja Samasiejku, jaki ŭžo adsiedzieŭ čatyry hady ŭ Pałacie pradstaŭnikoŭ, prakamentavać adnu ź viadomych zajavaŭ kiraŭnika Biełarusi. Jon nahadaŭ, što paśla prezydenckaj kampanii 2006 hoda Alaksandar Łukašenka zajaviŭ, što za jaho prahałasavała značna bolš ludziej, čym heta vydaŭ Centravybarkam. Ale jon zahadaŭ pamianiać hetyja ličby amal na 10 pracentaŭ. Labiedźka spytaŭ Samasiejku jak jurysta, ci jość tut pravaparušeńnie i złačynstva ź jurydyčnaha hledzišča, bo tut idzie havorka pra falsyfikacyju, nia važna, u jaki bok. Na heta Samasiejka adkazaŭ:
«Napeŭna, vy pamiatajecie heta vykazvańnie, jakoje skazana z uśmieškaj, žartam, paśla taho jak było skazana, što vybary sfalšavanyja. Nasamreč vy cudoŭna razumiejecie, što kiraŭniku krainy nie było nieabchodnaści falšavać, tym bolš u mienšy bok».
Na prośbu karespandenta «Svabody» Anatol Labiedźka prakamentavaŭ vykazvańni Mikałaja Samasiejki: «Pa sutnaści, jon nie adkazvaŭ ni na adno majo pytańnie. Jon nazvaŭ Łukašenku žartaŭnikom. Voś uvieś jaho adkaz. Heta adkaz nie jurysta. Ja ŭsio ž aryjentavaŭsia na toje, što Samasiejka — heta juryst ź vialikim dośviedam u sudzie. I na kvalifikacyju zajavy Łukašenki, što jon daŭ zahad, faktyčna, na falsyfikacyju vybaraŭ. To tut jon adkazaŭ nie jak juryst. Heta naohuł dziciačy adkaz, što heta byŭ žart».
Pad čas debataŭ Anatol Labiedźka taksama zhadaŭ pra palitviaźniaŭ, zajaviŭ pra najaŭnaść palityčnaj cenzury, bo ŭ radyjo i teleefir nia vyjšła bolš za 30 vystupaŭ kandydataŭ u deputaty (śpikieraŭ) ad AHP. Jon zaklikaŭ uładu i jaje kiraŭnika «spynicca ŭ tyražavańni złości i hvałtu, u nazapašvańni nianaviści». Źviarajučysia da vybarcaŭ jon skazaŭ — «idzicie i hałasujcie, kali chočacie, kab vas padmanvali». Taksama Labiedźka zaklikaŭ Samasiejku prynieści prabačeńni hramadzianam Biełarusi «za biaździejnaść i finansavy kalaps u minułym hodzie, jaki kaštavaŭ hramadzianam paŭtara miljarda dalaraŭ». Jon adznačyŭ, što pa svajoj inicyjatyvie deputaty Pałaty pradstaŭnikoŭ pryniali ŭsiaho try zakonaprajekty. Pavodle Labiedźki, «heta prykładna kali ślesar —zborščyk na „Haryzoncie“ zrabiŭ try televizary, a potym čatyry hady atrymlivaŭ zarobak».
Kali Samasiejka zrabiŭ zakid na adras AHP, što jana nie skarystałasia pravam zakanadaŭčaj inicyjatyvy, Labiedźka adkazaŭ:
«Viešajcie łokšynu razam z barščami spadaryni Jarmošynaj svaim prychilnikam. Nia ŭvodźcie ludziej ŭ zman. Vy pryniali taki zakonaprajekt, što realizavać prava zakanadaŭčaj inicyjatyvy niemahčyma. Prykład spadara Vusa, u kampaniju jakoha ŭvajšli i pradstaŭniki AHP. heta dakazvaje. Vy stvaryli taki zakon, kab ludzi nie mahli inicyjavać».
Miarkujecca, što ŭ aŭtorak u teledebatach voźmie ŭdzieł Stanisłaŭ Bahdankievič.
