U pytańni vydačy Biełaruśsiu Žanyša Bakijeva Kyrhyzstan raźličvaje na dapamohu Vykanaŭčaha kamiteta SND.Ab hetym, jak paviedamlaje infarmacyjnaje ahienctva 24.kg, zajaviŭ pres-sakratar MZS Kyrhyzstana Nuržyhit Kadyrbiekaŭ 12 vieraśnia na sustrečy z žurnalistami ŭ Biškieku.
"Kyrhyzstan rašuča nastrojeny dabivacca ad Biełarusi vydačy Žanyša Bakijeva i inšych asob, jakija znachodziacca ŭ mižnarodnym vyšuku", — padkreśliŭ jon.
Kadyrbiekaŭ nahadaŭ, što Kyrhyzstan nieadnarazova źviartaŭsia da biełaruskaha boku z zapytami ab vydačy Bakijeva i niekatorych inšych hramadzian, jakija abvinavačvajucca va ŭčynieńni asabliva ciažkich złačynstvaŭ u Kyrhyzstanie i znachodziacca ŭ miždziaržaŭnym vyšuku na terytoryi SND i ŭ mižnarodnym vyšuku pa linii Interpoła.
"Niahledziačy na heta, kirhizski bok znoŭ atrymaŭ admovu biełaruskaha boku, — skazaŭ jon. — My źviarnulisia ŭ Vykanaŭčy kamitet SND, raźmieščany ŭ Minsku, z prośbaj ab sadziejničańni ŭ vykanańni abaviazacielstvaŭ, pryniatych na siabie Biełaruśsiu pa Kanviencyi ab pravavoj dapamozie i pravavych adnosinach pa hramadzianska-siamiejnych adnosinach i kryminalnych spravach i inšych mižnarodnych dahavorach, padpisanych u 1993 hodzie".
Adnosiny pamiž Minskam i Biškiekam abvastrylisia ŭ suviazi z čarhovaj admovaj Hienprakuratury Biełarusi vydać małodšaha brata źvierhnutaha prezidenta Kurmanbieka Bakijeva Žanybieka (Žanyša) Bakijeva, jaki try tydni tamu byŭ sfatahrafavany ŭ centry Minska. Zdymak trapiŭ u internet i staŭ pryčynaj dypłamatyčnaha kanfliktu: 24 žniŭnia Biškiek adklikaŭ svajho pasła ź Minska.
Raniej ułady Biełarusi nieadnarazova admaŭlali ŭ vydačy Kurmanbieka Bakijeva.
