Vinahradavu — 12 sutak, Arcybašavu — 10 sutak, Viniackamu — 7 sutak 3

U sudzie Frunzienskaha rajona Minska prajšli sudy nad zatrymanymi ŭčora aktyvistami «Zmiena» — moładzievaha kryła kampanii «Havary praŭdu!», što zładzili ŭ aŭtorak la ŭniviersama «Frunzienski» pikiet za bajkot vybaraŭ.

Pavieł Vinahradaŭ asudžany na 12 sutak administracyjnaha aryštu, Alaksandr Arcybašaŭ — na 10 sutak, Jahor Viniacki — na 7 sutak, Hańnie Kurłovič prysudzili 2 miljony rubloŭ štrafu (20 bazavych vieličyniaŭ).

Usich čatyroch vinavacili ŭ niesankcyjanavanaj akcyi.

***

Maładych ludziej zatrymali 18 vieraśnia, kali jany sprabavali pravieści kala ŭniviersama «Frunzienski» ŭ Minsku pikiet za bajkot vybaraŭ: jany mielisia razdavać boršč.

Udzielniki pikieta paśpieli dastać kastrulu (časam užyvajuć słova «rondal»), raspalić haźnicu i raskłaści ŭlotki, paśla čaho akcyja była razahnanaja nieviadomymi ŭ cyvilnym. Jany zatrymali ŭsich udzielnikaŭ pikieta: Paŭła Vinahradava, Jahora Viniackaha, Alaksandra Arcybašava i Hannu Kurłovič. Razam ź imi byli zatrymanyja i siem žurnalistaŭ, jakija aśviatlali akcyju.

Usich dastavili va UUS Frunzienskaha rajona Minska. Z aparatury žurnalistaŭ vydalili fota- i videazdymki, zroblenyja padčas akcyi, i praź niekalki hadzin žurnalistaŭ adpuścili.

Pryčynaj dla pikieta stała viadomaja zajava Lidzii Jarmošynaj, zroblenaja joju 20 śniežnia 2010 hoda. Tady na pres-kanfierencyi pavodle vynikaŭ prezidenckich vybaraŭ, paśla žorstkaha razhonu ŭdzielnikaŭ mitynhu apazicyi kala Doma ŭrada, Jarmošynu spytali, ci ličyć jana apraŭdanymi dziejańni sił pravaparadku ŭ dačynieńni da ŭdzielnikaŭ akcyi. Na remarku žurnalista, što siarod demanstrantaŭ byli žančyny, kiraŭnik CVK zajaviła: «Vy viedajecie, hetym žančynam niama čaho rabić. Siadzieli b doma, boršč varyli, a nie pa płoščach šastali».

0

0

0

0

0

0