Ekołahi źbirajuć hrošy na łasia, jaki pradajecca z aŭkcyjona
Žyvioła pojdzie z małatka padčas kirmaša «Palavańnie i rybałoŭstva. Vosień-2012» 28–29 vieraśnia. Paśla łosia čakaje śmierć na palavańni.
Łoś, Brasłaŭski rajon, lipień 2012 h.
Zbor srodkaŭ inicyjavali siabry tavarystva «Zialonaje sieciva». Jany pierakananyja, što handlavać licenzijami na zabojstva nieetyčna i biaźlitasna.
Na sajcie Change.org idzie zbor podpisaŭ pad anłajn-pietycyjaj z patrabavańniem admianić aŭkcyjon. Ale, nie vielmi spadziajučysia na jaho, ekołahi adkryli dabračynny rachunak u «Biełarusbanku».
Pačatkovy košt licenzii na zabojstva łasia ― 6 miljonaŭ rubloŭ. Pa słovach aktyvista «Zialonaha sieciva» Kanstancina Čykałava, hrošy nie zhubiacca, navat kali ekołahi prajhrajuć aŭkcyjon:
«My dumajem, što košty na hetym aŭkcyjonie nie buduć zavobłačnyja. Ludziam, jakija zajmajucca palavańniem, praściej nabyć licenziju ŭ jakoj-niebudź haspadarcy, čym vykładać hrošy na tarhach. A arhanizatary aŭkcyjona, ja spadziajusia, raźličvajuć, chutčej, na pryciahnieńnie ŭvahi. Na žal, u nas zastałosia vielmi mała dzion na sbor srodkaŭ. Sabrać my miarkujem kala 10 miljonaŭ. U vypadku, kali my prajhrajem aŭkcyjon, ci kali jaho admieniać, na što my vielmi spadziajemsia, hrošy pojduć prytułkam ci na padkorm žyviołaŭ u zimovy pieryjad».
