Bližejšy asiarodak Łukašenki i bujnyja aliharchi, možna skazać, žyvuć u Vilni. Jany kuplajuć kvatery i damy, kantaktujuć z palitykami i miascovymi pradprymalnikami. I ŭžo daŭno farmujuć taki pohlad na režym Łukašenki, jaki im patrebny, paviedamiŭ telekanał TV3 u pieradačy «Kamientary tydnia».
U samym sercy staroj Vilni ŭ raskošnych apartamientach pravodziać vychodnyja biełaruskija aliharchi. I nie prosta baviać čas. Jak paviedamlajuć krynicy, tut kupili kvatery bližejšyja paplečniki Alaksandra Łukašenki.
Litoŭskija ŚMI nazyvajuć imiony niekatorych biznesoŭcaŭ i čynoŭnikaŭ.
Pavodle źviestak krynic, biełaruskija aliharchi nie hublajuć čas darma ŭ Vilni, a razmaŭlajuć ź litoŭskimi miljanierami — Aŭhuścinasam i Arturasam Rakaŭskasami, Taŭtvidasam Barštysam. Sami litoŭskija pradprymalniki nie vykazvajucca na hetuju temu.
«Ja ničoha nie budu kamientavać. Jašče raz paŭtaraju, prabačcie, ja ŭ adpačynku. Ni admaŭlać, ni paćviardžać ničoha nie budu», — skazaŭ Arturas Rakaŭskas.
Pa słovach palityčnych ahladalnikaŭ, situacyja dvuchsensoŭnaja: z adnaho boku, Vilnia pavinna radavacca, što ŭ Litvu pastupajuć dadatkovyja hrošy, ale nie možna nie bačyć i inšy aśpiekt — što, znachodziačysia ŭ Litvie, biełaruskija aliharchi i inšyja vysokapastaŭlenyja słužbovyja asoby akazvajuć vyhadny im ŭpłyŭ.
Palityčny ahladalnik Rymvidas Vałatka nie vyklučaje, što nazvanyja biełarusy "vykonvajuć zadańni KDB - padziejničać, paŭpłyvać, potym paviarnuć spravu tak, kab Litva mienš krytyčna staviłasia da Biełarusi, nie źviartała ŭvahi na parušeńni pravoŭ čałavieka".«I na samaj spravie, kali ŭspomnić dziŭny vypadak ź biełaruskim vajennym Ściapanam Zacharčankam, jakomu Litva nie dała palityčny prytułak, možna zrabić vysnovu, što heta, mahčyma, i jość vynik takich adnosin», - miarkuje analityk.
Departamient dziaržbiaśpieki Litvy admaŭlajecca kamientavać, ci sočać jany za nabytkami biełaruskich aliharchaŭ i za mahčymym upłyvam — nibyta heta nie ich śfiera. Pa słovach słužbovych asob DDB, biełaruskija čynoŭniki — taksama ludzi, i mohuć kuplać u Litvie nieruchomaść.
Staršynia kamiteta nacyjanalnaj biaśpieki i abarony Arvidas Anušaŭskas śćviardžaje, što, kuplajučy nieruchomaść u Litvie, atačeńnie Łukašenki, mahčyma, rychtuje płacdarm dla adstupleńnia.
«Čaściej za ŭsio ŭ aŭtarytarnych dziaržavach adbyvajucca takija pracesy, što bližejšaje asiarodździe rychtuje šlach adstupleńnia. Vilnia znachodzicca vielmi blizka ad Minska», — skazaŭ Anušaŭskas.
