Biełaruski palityčny ŭciakač u Ekvadory Alaksandr Barankoŭ, jakoha ekvadorskija ŭłady admovilisia departavać u Biełaruś, jakaja patrabavała jaho vydačy, vyrašyŭ zaniacca pravaabarončaj dziejnaściu, paviedamlaje ekvadorskaja La Hora.
84 dni, jakija pravioŭ u ekvadorskaj turmie były biełaruski vajskoviec
Hałoŭnaja paplečnica Barankova ŭ arhanizacyi prajektu — jahonaja niaviesta Mabel Andrade, ekvadorka, jakaja była blizkim śviedkam źniavoleńnia i pracesu padrychtoŭki da ekstradycyi svajho siabra.
Aprača hetaha svaju dapamohu zaprapanavali zamiežnyja pravaabarončyja arhanizacyi, ekvadorskija ŭniviersitety, śpiecyjalisty i ludzi dobraj voli, jakija dumajuć nad tym, jak skiravać dapamohu ŭ ekvadorskija turmy.
Barankoŭ kaža, što zamiežnyja viaźni ŭ ekvadorskich turmach znachodziacca ŭ składanym stanoviščy, na ich časta nažyvajucca advakaty, jakija prapanujuć svaje pasłuhi, atrymlivajuć hrošy i bolš nikoli nie pakazvajucca.
«Kožny źniavoleny maje svaju historyju i niezaležna ad taho, učynili jany niejkaje złačynstva ci nie — heta ludzi, jakim patrebny šaniec, kab viarnucca ŭ hramadztva, kab nie viarnucca na złačynny šlach i znoŭ nia trapić u turmu», — kaža biełarus, jaki nie atrymaŭ amal nijakaj dapamohi ad ekvadorskich pravaabarončych arhanizacyjaŭ.
Mienavita z hetaj pryčyny jon vyrašyŭ arhanizavać biaspłatnyja jurydyčnyja kansultacyi dla zamiežnych viaźniaŭ, jakija nie majuć svajho advakata, nazirańnie za sudovymi pracesami, a taksama dapamohu dzieciam, pazbaŭlenym svabody razam z svaimi maci.
Barankoŭ zaznačyŭ, što choć ekvadorskija ŭłady i harantujuć dziaržaŭnaha advakata tym viaźniam, jakija nie ŭ stanie apłacić pasłuhi pryvatnika, adnak u realnaści spravy vyhladajuć inakš. Časam zamiežnyja viaźni da dvuch hadoŭ čakajuć za kratami rašeńnia ab departacyi, choć pavodle zakona hety termin nie moža być daŭžejšy za dva miesiacy, i pry hetym nie atrymlivajuć ni ad koha nijakaj dapamohi.
Ciapier vyrašajucca jurydyčnyja pytańni adkryćcia fonda. Pieršymi zaprapanavali svaju dapamohu studenty ŭniversitetu Śviatoha Francyska ŭ Kita.
