Łukašenka zaćvierdziŭ špitalizacyju kiraŭnika Masada za 2,5 hadziny: novyja padrabiaznaści pra Dahana 23

Stan zdaroŭja byłoha kiraŭnika Masadu Meira Dahana, jaki na minułym tydni pieranios aperacyju pa pierasadcy piečani ŭ Miensku, značna palepšaŭ.

I choć Dahan usio jašče lažyć u reanimacyjnym adździaleńni, jon u prytomnaści.

Dahan paprasiŭ svaju žonku i siabroŭ prynieści jamu «dobry kavałak łasosia», adnak administracyja zabaraniaje svajakam pacyjentaŭ prynosić u špital charčavańnie. Tamu byłomu kiraŭniku źniešniaj raźviedki Izrailu daviałosia abychodzicca špitalnaj ježaj.

Dahan razmaŭlaje mała, i tym, chto naviedvaje jaho ŭ špitali, jon paviedamlaje, što ŭ jaho «ŭsio ŭ paradku».

Miarkujecca, što bližejšymi dniami jon budzie pieraviedzieny ŭ zvyčajnaje adździaleńnie.

Tym časam źjaŭlajucca novyja padrabiaznaści, źviazanyja z historyjaj špitalizacyi Dahana.

Niekalki tydniaŭ tamu ministar zamiežnych spravaŭ Izrailu Avihdor Liberman źviarnuŭsia da adnaho z aficyjnych izrailskich pradstaŭnikoŭ u stalicy Biełarusi, raskazaŭ jamu ab sytuacyi, u jakoj apynuŭsia były kiraŭnik Masadu, i paprasiŭ źviarnucca da prezydenta Alaksandra Łukašenki z prośbaj špitalizavać Dahana va ŭradavy špital — z metaj praviadzieńnia aperacyi pa pierasadcy piečani.

U toj samy dzień izrailski pradstaŭnik źviarnuŭsia da namieśnika prem'jer-ministra Biełarusi Anatola Tozika, i toj pieradaŭ prośbu Łukašenku. «Prezydent Łukašenka zaćvierdziŭ hetuju prośbu na praciahu dvuch z pałovaj hadzinaŭ», — raspavioŭ nam adzin z udzielnikaŭ hetych pieramovaŭ.

Užo praz dva dni paśla hetaha Dahan byŭ dastaŭleny ŭ Miensk na pryvatnym samalocie.

Jaho sustrakaŭ namieśnik načalnika sakretnaj słužby Biełarusi. Dahan prylacieŭ u Miensk razam z žonkaj i dziećmi, u supravadžeńni izrailskich ciełaachoŭnikaŭ. Były kiraŭnik Masadu byŭ pryniaty na ŭzroŭni kiraŭnika dziaržavy i dastaŭleny ŭ hatel u supravadžeńni kartežu ŭradavych aŭtamabilaŭ.

Na praciahu piaci nastupnych dzion jon prajšoŭ usie nieabchodnyja medycynskija pravierki, jakija paćvierdzili hatoŭnaść da aperacyi.

Ciapier zastavałasia tolki znajści donara. Administracyja medyčnaha centru paviedamiła, što praces pošuku zojmie dva-try dni, i Dahan vyrašyŭ viarnucca ŭ Izrail, kab pravieści dni pierad aperacyjaj z unukami. Praź niekalki hadzinaŭ paśla taho, jak jon viarnuŭsia dadomu, jamu patelefanavali ź Miensku i paviedamili, što donar znojdzieny.

Dahan viarnuŭsia ŭ stalicu Biełarusi. Śledam za im u Miensk specyjalnym rejsam z Paryžu prylacieŭ francuski chirurh, doktar Daniel Azułaj.

«Hetym razam Dahan vyhladaŭ pa-sapraŭdnamu chvorym, — raspavioŭ nam adzin z tych, chto sustrakaŭsia z byłym kiraŭnikom Masadu ŭ hetyja dni. — Jon ź ciažkaściu dychaŭ, jaho tvar sčarnieŭ. Jon vyhladaŭ tak, niby znachodziŭsia pry śmierci».

Biełaruskija specsłužby padrychtavali dla Dahana raskošny aŭtamabil BMV, adnak toj paličyŭ za lepšaje vypravicca ŭ špital razam z žonkaj i ciełaachoŭnikami na zvyčajnaj mašynie, jakuju supravadžali ŭradavyja aŭtamabili.

U špitali doktar Azułaj nieadkładna prystupiŭ da praviadzieńnia aperacyi, jakaja doŭžyłasia dzieviać hadzin. Jamu dapamahaŭ kalektyŭ miascovych lekaraŭ, jaki atrymaŭ vysokuju acenku za svoj prafesijanalizm ad francuskaha chirurha.

Za niekalki hadzin da aperacyi, u chodzie praviadzieńnia apošnich pravierak, Dahan pieradaŭ Libermanu praz adnaho ź izrailskich pradstaŭnikoŭ u Miensku takoje paviedamleńnie: «Skažy dziakuj Ivetu» (Ivet — pamianšalnaja forma imia Libermana).

Liberman praciahvaje atrymlivać infarmacyju pra stan Dahana ŭ mienskim špitali.

Pacyjenta naviedaŭ taksama biełaruski ministar achovy zdaroŭja. Niekalki dzion tamu prezydent Šymon Peres patelefanavaŭ Alaksandru Łukašenku i padziakavaŭ jamu za dapamohu. Łukašenka raskazaŭ Peresu, što jon znajomy z Dahanam pa minułych sustrečach i zaprasiŭ izrailskaha prezydenta naviedać Biełaruś.

Radyjo Svaboda

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH