Na krai Kurapataŭ budujuć mieharestaran «Bulbaš'-choł» — foty 70

U restaranie budzie 400 miescaŭ + łaźnia j domiki.

Restaran budujecca za sotniu mietraŭ ad kraju kurapackaha lesu.

Pracy išli cełaje leta.

Buduje kampanija «Naša restarannaja hrupa» (NRH).

U Kurapatach chavali rasstralaych u časy Vialikaha Teroru.

Pachavańni byli adkryty ŭ kancy 1980-ch. Z čych časoŭ les pieratvaryŭsia ŭ Kryžovuju Haru.

Dakładnych śpisaŭ pachavanych u Kurapatach niama.

Pobač z restaranam budzie dziciačaja placoŭka ź vidam na niekropal.

Dla restarana abrali krasamoŭnuju nazvu: «Bulbaš'-choł».

Miesca kala MKAD abiacała być ludnym, ale minčuki mohuć i bajkatavać taki restaran.

Tancy buduć po poŭnaj prahramie. Što nazva, što miesca: «Bulbaš'-choł» — vializny zabaŭlalny kompleks z restaranam na 400 miescaŭ, vialikaj łaźniaj. Dla «žadajučych» — asobnyja domiki.

Dla inšych — dziciačaja placoŭka.

Usio heta ŭžo hod jak budujecca nad MKAD, akurat na zachodnim uskrajku Kurapataŭ, nasuprać katedžavaha pasiołka Cna, za kałcavoj.

Buduje kampanija «Naša restarannaja hrupa» (NRH), viadomaja minčukam restaranami «Kušaviel», «Dača» i «Tuse».

Treba ŭdakładnić, što Zavod vinahradnych vinaŭ «Dyjanis», jaki vyrablaje ałkaholnyja napoi «Bulbaš'», nijakaha dačynieńnia da budaŭnictva kala Kurapataŭ nie maje. «Bulbaš'» — zarehistravanaja NRH marka ŭ kłasie ustanovaŭ hramadskaha charčavańnia, jaki prosta supadaje z brendam harełak.

Na žal, kamientavać lubyja pytańni, źviazanyja z novym restaranam, pradstaŭniki NRH admovilisia, choć pryvatna našy surazmoŭcy ŭ NRH sami asudzili vybar miesca dla budoŭli kiraŭnictvam kampanii.

Na svaim sajcie «Naša restarannaja hrupa» abiacaje ŭvodzić u dziejańnie dźvie-try takija ŭstanovy ŭ hod, tym samym zabiaśpiečvajučy žycharam stalicy «dobry i cikavy adpačynak». Kurapacki «Bulbaš'-choł» pretenduje na pieršynstvo. «My ŭbudoŭvajemsia ŭ horad, uličvajem jaho struktru, uplatajemsia ŭ jaho kryvanosnuju sistemu» — tak prezientuje siabie kampanija.

Adzin z budaŭnikoŭ na abjekcie, Siarhiej, vykazaŭ svaje dumki nakont budoŭli prosta: «Niapravilna heta — budavać restaran kala Kurapataŭ.

Ale ž kali hrošy jość — usio dazvolena. Nam płaciać dobra. Da viasny nastupnaha hoda ŭsio budzie hatova. Ciapier zajmajemsia ŭnutranym azdableńniem. Vam i nie śniłasia, jak tam pryhoža! Plitkaj usio vykładziena, najnoŭšaje abstalavańnie. Tut i domiki dla adpačynku, i łaźnia.

Bahaciei buduć siudy svaich prastytutak vazić.

Ale heta dla bahatych, nie dla nas z vami».

Žychary Zialonaha Łuhu trymajucca inšaj dumki. «Tam palahli najlepšyja ź biełarusaŭ, — kaža mnie babula Taćciana Piatroŭna. — Ja choć i staraja, a tudy kvietki našu. Budaŭnictva kala jaho restarana — prosta žach niejki!» A voś hrupa padletkaŭ u adkaz na majo pytańnie zarahatała: «Jakaja śmiešnaja nazva! A što heta takoje?»

U lasnym uročyščy Kurapaty znoŭ vosień. Cicha apadaje listota, skačuć rudyja vaviorki.

Tut pachavany dziasiatki tysiač rasstralanych, a źniščana tady była ŭsia elita biełaruskaj nacyi, da apošniaha čałavieka, ad zamožnych sialan da ministraŭ i akademikaŭ. Palitaje kryvioj uročyšča było zaniesienaje ŭ Dziaržaŭny śpis historyka-kulturnych kaštoŭnaściaŭ.

Terytoryja za MKAD naležyć Minskaj vobłaści. Tamu adpaviedny davzoł na budaŭnictva davali rajvykankam i abłvykankam. My nakiravali im adpaviednyja zapyty, čakajem adkazu. Farmalna pole, na jakim paŭstaje restaran, nie padpadaje pad achoŭnuju zonu. Ale vybar typu abjekta i jahonaja nazva vyhladajuć jak vyklik.

Na pačatku 2000-ch ułady addali pole na ŭschod ad Kurapat pad katedžavy pasiołak, ale paśla pratestaŭ hramadskaści admianili svajo rašeńnie. Ci možna jašče zatrymać realizacyju prajekta, źmianić pryznačeńnie abjekta, ci heta ŭžo machańnie kułakami paśla bojki, i ŭsio -- pozna, hramadstva i ŚMI pramarhali, kali heta pačynałasia?

Čytajcie pra heta ŭ našych nastupnych publikacyjach.

Hanna Žuravina

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH