U Minsku milicyja vyjaviła padpolny cech pa padrobcy adzieńnia viadomych biełaruskich brendaŭ 9

Supracoŭniki słužbaŭ pa baraćbie z ekanamičnymi złačynstvami HUUS Minharvykankama i Savieckaha RUUS u pryvatnym domie pa 3-m zavułku Kalcova vyjavili padpolnuju šviejnuju vytvorčaść. Pašytaje tut samatužnym sposabam žanočaje adzieńnie vydavali za pradukcyju viadomych ajčynnych vytvorcaŭ.

Jak paviedamili ŭ pres-słužbie staličnaj milicyi, spačatku ŭ orhany ŭnutranych spraŭ pastupiła apieratyŭnaja infarmacyja ab pracy padpolnaha pašyvačnaha cecha žanočaha adzieńnia. Hatovyja sukienki častkova pradavali na adnym sa staličnych rynkaŭ, ale bolšaść pradukcyi adpraŭlali na rynki rasijskich haradoŭ. Pry hetym na samapalnyja kaściumy i spadnicy pryšyvalisia birki i etykietki roznych biełaruskich vytvorcaŭ.

Padčas praviadzieńnia apieratyŭnych pravieračnych mierapryjemstvaŭ vyśvietliłasia, što ŭ domie, jaki cikaviŭ milicyjanieraŭ, užo doŭhi čas nichto nie žyvie.

Haspadynia zdała jaho ŭ arendu svajoj znajomaj, i taja ŭ pamiaškańniach dvuchpaviarchovaha katedža arhanizavała šviejnuju vytvorčaść. Praca vykonvałasia pa miery pastupleńnia zamoŭ. Dla pašyvu žanočaha adzieńnia vykarystoŭvałasia śpiecyjalnaje abstalavańnie, na jakim pracavali najomnyja pracaŭniki.

Nieŭzabavie supracoŭniki milicyi razam z kalehami z padatkovaj inśpiekcyi naviedalisia ŭ nielehalny cech.

Akazałasia, što vytvorčaść arhanizavana z razmacham. Było vyjaŭlena dziesiać adzinak darahoha šviejnaha abstalavańnia, 25 rułonaŭ tkaniny, raznastajnyja vykrajki, vialikaja kolkaść taśmy, nitak, furnitury. Akramia taho, u adnym z pakojaŭ apieratyŭniki znajšli 88 kamplektaŭ hatovych žanočych kaściumaŭ i 14 spadnic.

Ciapier razhladajecca pytańnie ab pryciahnieńni arhanizatara nielehalnaj vytvorčaści da adkaznaści pa niekalkich artykułach Administracyjnaha kodeksa, jakija źviazany z parušeńniami ŭ halinie pradprymalnickaj dziejnaści. Pravieračnyja mierapryjemstvy praciahvajucca.

Viačasłaŭ Budkievič, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH