Zvarot Alaksandra Łukašenki da nacyjanalnaha schodu byŭ vytrymany va ŭźvinčanym tonie i nasyčany patrabavańniami administracyjnaha ŭmiašańnia ŭ ekanomiku. Siarod inšaha, A.Łukašenka ŭ žyvym efiry zapatrabavaŭ pasadzić byłoha ministra budaŭnictva Kuračkina i «tych, chto jaho prykryvaje».
Tradycyjnaje viesnavoje pasłańnie narodu i parlamentu sioleta prypała na 24 krasavika i było pryznačana na 12.00.
Alaksandar Łukašenka źjaviŭsia sa spaźnieńniem na siem chvilinaŭ. Pasiedžańnie adkryŭ Uładzimier Kanaploŭ. Paśla hetaha prahučaŭ himn «My, biełarusy, mirnyja ludzi…»
Pavažanyja tavaryšy, — pačaŭ A.Łukašenka. — Pierš čym pačać zvarot nie mahu nia vykazać słovy spačuvańnia Barysu Jelcynu… Jon zaklikaŭ ušanavać pamiać Jelcyna chvilinaj maŭčańnia.
«Alternatyvy adnosinam z Rasiejaj niama»
«Niezaležnaja Biełaruś — naš nadziejny i dastojny dom», — taki zahałovak sioletniaha pasłańnia ahučyŭ A.Łukašenka.
Jon pačaŭ samu zajavu z padkreślivańnia, što niezaležnaść krainy moža być zabiaśpiečana tolki «bolš symetryčnaj» zamiežnaj palitykaj. Adnak paśla hetaha jon paŭtaryŭ, što nijakich źmienaŭ u joj nia budzie i što Rasieja i sajuz ź joju zastajucca ŭ pryjarytetach biełaruskaj palityki. «Ruskija ludzi nam nie čužyja, — zajaviŭ jon, — Alternatyvy adnosinam z Rasiejaj niama».
Ad adnosinaŭ z Rasiejaj jon pierajšoŭ da adnosinaŭ z Ukrainaj i Azerbajdžanam i zajaviŭ pra nieabchodnaść zabieśpiačeńnia bieśpierabojnaści pastavak enerhanośbitaŭ u Zachodniuju Eŭropu.
«Voś i ŭsia Venesueła»
Ad pytańniaŭ zamiežnaj palityki jon pierajšoŭ da enerhietyki. Jon rezka raskrytykavaŭ naftapierapracoŭčuju halinu, zaklikaŭšy naftavikoŭ šukać srodki nie ŭ dziaržaŭnym biudžecie, a ŭ samich siabie. Jon nazvaŭ stvareńnie ŭłasnabiełaruskaj kalijnaj kampanii spravaj, jakaja pryniesła nadzvyčajnuju karyść Biełarusi, i zapatrabavaŭ chutčej stvaryć analahičnuju naftavuju kampaniju.
Jon adznačyŭ važnaść zabieśpiačeńnia rezervavych varyjantaŭ pastavak nafty z Bałtyjskaha i Čarnamorskaha rehijonaŭ. Kraina pačuła pryznańnie, što ŭ časie biełaruska-rasiejskaha naftahazavaha kryzisu alternatyvy pastaŭkam nafty z Rasiei nie było, i prajšło 10 dzion, pieršy čym jaje ŭdałosia znajści.
A.Łukašenka padkreśliŭ: u vypadku kali Rasieja prapanuje bolš vyhadnyja varyjanty pastaŭki enerhanośbitaŭ, Biełaruś zastaniecca z Rasiejaj.
Paśla hetaha kiraŭnik dziaržavy pierajšoŭ da važnaści vykarystańnia alternatyŭnych krynicaŭ enerhii. Mieŭsia na ŭvazie pieravod na drovy małych pradpryjemstvaŭ i viosak.
Jon zaklikaŭ apazycyju «nie ihrać» na pytańni pabudovy atamnaj elektrastancyi, bo pabudova AES — zaruka nacyjanalnaj i enerhietyčnaj biaśpieki.
Jon zajaviŭ, što nia choča, kab AES pabudavała Rasieja, ale paabiacaŭ adkryty mižnarodny konkurs, u jakim pieramoža toj, chto prapanuje bolš vyhadnyja ŭmovy, i Rasieja budzie ŭdzielničać u im na roŭnych. «My j tak u mnohim zaležym ad Rasiei. My b chacieli, kab AES pabudavali inšyja, ale pryjarytet budzie addadzieny canie i jakaści. Kali konkurs vyjhraje Rasieja, jak by nam nie padabałasia, što jajka znoŭ papadaje ŭ adzin košyk, budzie budavać Rasieja».
Jon padrabiazna spyniŭsia na pytańniach enerhaaščadžeńnia. «U nas enerhajomistaść VUP u 2,5 razy vyšejšaja, čym u raźvitych krainach. Voś i ŭsia Venesueła», — zajaviŭ jon.
Vyvad byŭ prosty: ličylniki vady musiać być ustalavanyja ŭ kožnaj kvatery.
«Pavyšeńnie cenaŭ na enerhanośbity — heta niepryjemny faktar, ale davajcie razhladać jaho jak stymuł dla ŭdaskanaleńnia ekanomiki", - prapanavaŭ A.Łukašenka.
«Karovy dyzpaliva nie dajuć»
Treciaj častka pasłańnia stała ekanomika. Asnovaj dziaržaŭnaha kursu tutaka stanie źmianšeńnie dziaržaŭnych datacyj. Pa jahonych słovach, z 2008 hodu subsydyi buduć nakiroŭvacca tolki ŭ najnoŭšyja, navukajomistyja technalohii.
«Karovy dyzelnaha paliva nie dajuć», — zajaviŭ jon. Tamu lhotnaha dyzpaliva sielhaspradpryjemstvy nie atrymajuć.
Jon nazvaŭ apraŭdanym kurs na pastupovuju pieradaču pryvatnamu ŭłaśniku sielhaspradpryjemstvaŭ.
Jon nahadaŭ, što kančatkovaje rašeńnie pa pryvatyzacyi kožnaha pradpryjemstva budzie prymać asabista jon. «Mnie za 13 hadoŭ nichto nie prynios nijakich hrošaj i nie pakłaŭ na stoł, nie pryniasie i nie pakładzie. Kali b takoje było, užo b raśpisali, razmazali pa ŭsich ścienkach ad Zachadu da Ŭschodu. Kali ŭžo Buš tam šukaŭ maje rachunki, dahetul znajści nia moža. Nu, kali Buš nie znajšoŭ, to naŭrad ci chtości znojdzie, kali jany navat byli».
Jon havaryŭ pra pieršačarhovyja zadačy madernizacyi enerhietyčnaha kompleksu, mikraelektronnaj, lasnoj i celulozna-papiarovaj pramysłovaści, budaŭnictva.
Było zajaŭlena pra nieabchodnaść rezkaha skaračeńnia lhotaŭ u sacyjalnaj sfery.
«Raźbiaryciesia i pasadzicie»
Nia raz za vystup jon viartaŭsia da sfery budaŭnictva i rostu cenaŭ na žytło. Jon padvierh rezkaj krytycy Ministerstva budaŭnictva i jaho prajektnyja instytuty.
Sa słovaŭ A.Łukašenki, ministar Navumaŭ u časie subotnika zajaviŭ, što byłoha ministra budaŭnictva treba nieadkładna pasadzić. Dyk u vas ža jość dla hetaha paŭnamoctvy, — źviarnuŭsia jon da ministra, jaki ŭskočyŭ sa svajho miesca. Za toje, što jon narabiŭ na pasadzie ministra i na pasadzie dyrektara instytutu, na jakuju jon pierajšoŭ ź ministerstva i dzie pačaŭ užo «kałupać pad miljony dalaraŭ, vyłučanych na pabudovu spartovaha kompleksu». «Nu dyk raźbiaryciesia i pasadzicie i jaho, i tych, chto jaho prykryvaje», — zajaviŭ A.Łukašenka, dadaŭšy, što ministar unutranych spravaŭ unios premjer-ministru prapanovu i napisaŭ, za što. Heta nahadała znajomyja sceny z 90-ch hadoŭ.
U cełym ton jahonaha vystupu byŭ daloka nia rynkavym. Faktyčna ŭ kožnaj sfery jon patrabavaŭ pryniaćcia administracyjnych mieraŭ rehulavańnia rynku i padkreślivaŭ asabisty kantrol za roznymi sferami ekanomiki. Časam jon supiarečyŭ sam sabie. Jon havaryŭ pra «ŭsiamiernuju padtrymku pryvatnaha pradprymalnictva», «stabilnaść umovaŭ haspadarańnia» i adnačasova zahadvaŭ pryniać administratyŭnyja miery pa abmiežavańni svabody dziejańniaŭ u tym samym budaŭničym biznesie i asabistym kantroli supracoŭnikaŭ vertykali i dziaržkantrolu za tymi ci inšymi spravami. Nia treba ščoŭkać abcasami, dryžać pierad małymi pradprymalnikami i bajacca, što jany vyjduć na Płošču, zajaviŭ jon.
"Heta niepasilnyja, ale vyrašalnyja zadačy", — zajaviŭ jon u inšym miescy.
Rehulatyviscki ton prajaŭlaŭsia i ŭ havorcy pra sacyjalnuju sferu. Uvohule, samymi častotnymi słovami ŭ dakładzie było «pavinien, pavinny, abaviazany, treba».
Nie mahu skazać, što my ŭsie prablemy vyrašyli, zajaviŭ A.Łukašenka pry rešcie, ale kožny čałaviek u Biełarusi, jaki choča dobra žyć, moža lohka hetaha dabicca.
Časam jon žartavaŭ, ale ŭ cełym vyhladaŭ davoli ŭźvinčanym.
Dakład doŭžyŭsia trochi mieniej za dźvie hadziny i ni razu nie pieraryvaŭsia vopleskami.
