Viarchoŭny sud paviedamiŭ maci Ŭładzisłava Kavalova, pakaranaha śmierciu pa spravie ab vybuchu ŭ mienskim metro, što nahladnaja skarha na śmiarotny prysud znachodzicca na razhladzie. A ŭ suviazi ź nieabchodnaściu «dadatkovaha vyvučeńnia materyjałaŭ kryminalnaj spravy» termin vyrašeńnia skarhi padoŭžany. Ab pryniatym rašeńni budzie paviedamlena dadatkova.
Luboŭ Kavalova paviedamiła «Svabodzie», što ŭ źviazku z hetym 8 listapada pieradała skarhu ŭ Hienprakuraturu, bo Viarchoŭny sud pavinien byŭ razabracca ciaham miesiaca ad momantu padačy skarhi.
Luboŭ Kavalova:
«Nahladnuju skarhu ja padavała naprykancy vieraśnia. I praź miesiac pryjšła hetaja adpiska. Jany nia mieli prava vykonvać śmiarotny prysud, pakul my nie skarystajem usie srodki abarony. Ale tady jany vielmi śpiašalisia. Padać nahladnuju skarhu pavinien byŭ jašče sam Uład i jahony advakat.Ale advakata da Ŭłada tady nie puścili dla napisańnia nahladnaj skarhi. Advakat sprabavaŭ patrapić, ale Ŭłada ŭžo nie było ŭ žyvych. Jany ŭsio raźličyli i ŭsio rasplanavali».
U skarzie byli vykładzienyja parušeńni kryminalna-pracesualnaha kodeksu padčas śledztva i sudu nad Uładzisłavam Kavalovym.
Zhadvajecca i videazapis z metro z elementami mantažu, i vyniki ekspertyzy, zhodna ź jakimi ni na vopratcy, ni na ciele ŭ Dźmitryja Kanavałava i Ŭłada Kavalova nia vyjaŭlena śladoŭ vybuchovych rečyvaŭ. Taksama ŭ skarzie havorycca, što Kavalova faktyčna pazbavili prava na abaronu: pakul viałosia śledztva, advakata da Ŭłada dapuścili tolki adzin raz. Advakat moh sustrakacca z padabaronnym tolki padčas śledčych dziejańniaŭ, a ŭ sudzie takaja mahčymaść davałasia, kali Kavalova pryvodzili ŭ kletku pierad pačatkam pracesu. Ničoha nie źmianiłasia i paśla vyniasieńnia prysudu: advakata nie puskali ŭ SIZA KDB. Akramia taho, na sudzie bolšaść chadajnictvaŭ abarony byli adchilenyja.
11 krasavika 2011 hodu na stancyi «Kastryčnickaja» metrapalitenu spracavała mahutnaje samarobnaje vybuchovaje prystasavańnie. 11 čałaviek zahinuli na miescy. Vinavatymi ŭ terakcie sud pryznaŭ Dźmitryja Kanavałava i Ŭładzisłava Kavalova. Jany byli asudžanyja da śmiarotnaha pakarańnia.17 sakavika 2012 hodu stała viadoma, što prysudy pryviedzienyja ŭ vykanańnie.
7 kastryčnika ŭ Amsterdamie Luboŭ Kavalova ahučyła pačatak kampanii «Viarnicie cieła». Kampanija ŭklučaje ŭ siabie try aspekty: vydaču cieła Ŭłada Kavalova siamji dla pachavańnia i admienu śmiarotnaha pakarańnia ŭ Biełarusi; viartańnie ciełaŭ vykradzienych i zabitych apanentaŭ režymu Łukašenki i spraviadlivaje raśśledavańnie akaličnaściaŭ ich śmierci; vyzvaleńnie palitviaźniaŭ, kožny ź jakich ciapier u niebiaśpiecy.
