Piać faktaŭ pra hienierał-lejtenanta Vadzima Zajcava 14

1. Atrymaŭ pasadu paśla terakta

Imia Vadzima Zajcava šyrokaj hramadskaści stała viadoma paśla terakta 2008 hoda na stele «Minsk — horad-hieroj». Namieśnika staršyni pamiežnaha kamiteta Zajcava pryznačyli staršynioj kamiteta dziaržaŭnaj biaśpieki zamiest Juryja Žadobina, jaki na karotki termin pierajšoŭ pracavać u Radu biaśpieki. Darečy, tyja źmieny ŭ kiraŭnictvie krainy byli acenienyja, jak pasył Jeŭropie. Łukašenka tady zvolniŭ «jastrabaŭ» Šejmana i Niavyhłasa.

Pryznačyŭšy ŭradženca Ukrainy Zajcava, Łukašenka praciahnuŭ savieckuju tradycyju, kali ŭ orhany dziaržbiaśpieki nie stavilisia etničnyja biełarusy. Za časami SSSR HPU Biełarusi ŭznačalvaŭ tolki adzin biełarus — Pilip Miadźviedź (1924–1925).

2. Pašyrylisia viarboŭki

Mienavita za kiraŭnictvam u KDB Vadzima Zajcava pačali šyroka ahučvacca hramadskimi aktyvistami vypadkaŭ viarboŭki. Pryčym, vierbavali stvaralnikaŭ niezaležnych internet-resursaŭ, hiej-aktyvistaŭ, maderataraŭ hrup u sacyjalnaj sietcy Ukantakcie.

Asabliva bujnyja pamiery viarboŭka nabyła paśla przidenckich vybaraŭ u SIZA KDB «Amierykancy». Akazaŭšysia ŭ nialudskich umovach, byli zavierbavanyja kandydat u prezidenty Aleś Michalevič, kiraŭnik štaba Andreja Sańnikava Uładzimir Kobiec. Ale jany ahučyli fakt viarboŭki, publična admovilisia ad supracoŭnictva. Astatnija viaźni «amierykanki» taksama pryznavalisia, što da ich prychodzili z padobnymi prapanovami.

3. Mieŭ razmovu z Andrejem Sańnikavym

«31 śniežnia ŭ mianie była prymusovaja hutarka z staršynioj KDB Vadzimam Zajcavym, jaki pahražaŭ žyćciom i zdaroŭjem žonki i dziciaci. Kali ja admoviŭsia, to Zajcaŭ skazaŭ, što suprać ich buduć bolš žorstkija mietady. Ja byŭ uražany. I zrazumieŭ, što ad mianie zaležyć žyćcio žonki i dziciaci», — takija pakazańni na sudzie davaŭ kandydat u prezidenty Andrej Sańnikaŭ.

Pierad minułymi prezidenckimi vybarami Zajcaŭ paviedamlaŭ pra zatrymańnie kurjeraŭ apazicyi, ale nidzie dalej padrabiaznaściaŭ nie było. Dyk ci isnavali jany ŭvohule?

4. Padmiaŭ Hienprakuraturu, MUS

Užo praź miesiac paśla pryznačeńnia Zajcava na pasadu staršyni byli istotna pašyranyja paŭnamoctvy Kamiteta. Było dazvolena pravodzić apieratyŭna-vyšukovyja mierapryjemstvy, prymianiać rašeńni pa miery ŭtrymańnia i ździajśniać asobnyja pracesualnyja dziejańni pa pastanovach staršyni KDB. Tahačasny hienieralny prakuror Ryhor Vasilevič nie pahadziŭsia z takimi prapanovami.

U chutkim časie Hienprakuratura paciarpieła ad novaŭviadzieńniaŭ. Pavodle pastanovy Vadzima Zajcava była zaviedzienaja kryminalnaja sprava na śledčuju pa asabliva važnych spravach Hienprakuratury Śviatłanu Bajkovu.

Mienavita pry Zajcavu razharnułasia viadomaja «palaŭničaja sprava», jakaja stała apahiejem zmahańnia KDB i MUS. «Čekisty» atrymali pieramohu. Praciahvalisia aryšty ŭ Dziaržkantroli.

5. Jak ź miadźviedzikami

Situacyja z adstaŭkaj Vadzima Zajcava nahadvaje žnivieńskuju historyju z kiraŭnikom pamiežnaha kamiteta Iharam Račkoŭskim. Tady aficyjnyja krynicy admaŭlali fakt šviedskaha plušavaha desanta nad Biełaruśsiu. Pakul u spravu nie ŭmiašaŭsia Łukašenka.

Ciapier u KDB hetak sama admaŭlali fakt samahubstva adnaho z supracoŭnikaŭ. Łukašenka na piatničnaj naradzie paćvierdziŭ, što padpałkoŭnik Kazak sapraŭdy zrabiŭ sabie śmierć.

U vyniku Račkoŭskaha praź niejki čas prabačyli, pryznačyŭšy vice-prezidentam NAK. Zajcavu moža taksama znajścisia miesca ŭ sporcie. Jon uznačalvaje federacyju bijatłona. Sioleta Zajcavym byŭ padpisany kantrakt na trenierstva zbornaj nie aby z kim, a z samim Rafaelem Puare, adnym z najlepšych bijatłanistaŭ u historyi.

Źmicier Pankaviec

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH