Ale administracyja pieradała praz kuratarku vystavy, što va ŭniviersitecie ciaham tydnia budzie prachodzić pieraatestacyja i zała budzie zaniataja.
Kuratar vystavy Kaciaryna Miaśnikova kaža, što ŭsie terminy ŭzhadnialisia zahadzia:
«Adkryćcio vystavy Alaksieja Maračkina „Viartańnie“ było zapłanavanaje naležnym čynam, my ŭžo dali abviestki ŭ miascovyja haziety. Ale patelefanavaŭ dekan mastacka-hrafičnaha fakulteta VDU Dźmitryj Siańko i paviedamiŭ, što vystava admianiajecca. Pryčyna — zaniataść zały. Pra pieranos terminaŭ havorki nie było, tak što treba razumieć, što admova — kateharyčnaja. Choć jašče ŭ minułuju piatnicu zahadčyk kafiedry Hienadź Isakaŭ zapeŭnivaŭ, što ŭsio idzie jak maje być».
Karciny dla ekspazicyi pavinny byli prybyć u Viciebsk ranicaj 26 listapada.
Daviedaŭšysia pra admienu vystavy, Alaksiej Maračkin paśpieŭ u apošni momant vyhruzić ich z mašyny, jakuju daŭ Sajuz mastakoŭ.
Prabačeńnia za raptoŭnuju admienu vystavy nichto nie paprasiŭ. Z VDU navat nie patelefanavali, kab papiaredzić:
«Tamu i prykra, što ja skančaŭ viciebski „chudhraf“, byŭ u pieršym vypusku.
I kali ŭviesnu my źjechalisia na 50-hadovy jubilej fakulteta i prahučała prapanova arhanizavać takuju vystavu, ja byŭ vielmi ŭściešany. A ciapier razumieju, što ŭsio zakanamierna: ja znachodžusia ŭ „čornym śpisie“. Dva hady tamu ja padavaŭ zajaŭku na vystavu ŭ minskim Muziei sučasnaha mastactva. Mnie admovili — znajšłasia pryčyna. Potym padaŭ zajaŭku ŭ Mastacki muziej. Taksama admovili — dyrektar Uładzimir Prakapcoŭ skazaŭ, što „muziejnaja palityka“ źmianiłasia, bolš piersanalnych vystavaŭ nie budzie, a tolki vystavy z fondaŭ. Heta chłuśnia, piersanalnyja vystavy byli i paśla taho… Ciapier u Viciebsku terminy byli ŭzhodnienyja, i maje vysnovy takija: možna prydumać lubyja pryčyny, ale niechta, vidać, patelefanavaŭ! U savieckija časy ideołahi prapanoŭvali nam falšyvyja idei pabudovy kamunizmu, to ciapier ideałohija inšaja — kab tolki zachavać svaju pasadu, na kaleniach poŭzać pierad svaim haspadarom!»
Alaksiej Maračkin kaža, što nie źbiraŭsia vystaŭlać niejkija tvory pravakacyjnaha źmiestu. Što admysłova padabraŭ raboty, kab tam nie było nonkanfarmizmu, uziaŭ rannija pracy ź viciebskaha pieryjadu.
