15 maja mitrapalit Minski i Słucki Fiłaret, patryjaršy ekzarch usiaje Biełarusi padpisaŭ ukaz ab zabaronie ŭ śviaščennasłužeńni kliryka Śviata‑Pakroŭskaha prychoda Minska, śviatara Alaksandra Šramko i zaličyŭ jaho za štat da raskajańnia.
Takim čynam, uładyka Fiłaret zaćvierdziŭ rekamiendacyju carkoŭnaha suda, pasiadžeńnie jakoha adbyłosia 10 maja pad staršynstvam błahačynnaha Minskaj akruhi i nastajaciela Śviata‑Duchava kafiedralnaha sabora, prataijereja Hienadzia Dzičkoŭskaha. Sud rekamiendavaŭ mitrapalitu zabaranić A.Šramko słužeńnie za toje, što jon biez carkoŭnaha błahasłavieńnia 25 krasavika ŭdzielničaŭ u pres‑kanfierencyi arhanizataraŭ kampanii pa abaronie pravoŭ na svabodu sumleńnia i rabiŭ publičnyja zajavy, jakija supiarečać aficyjnaj pazicyi Biełaruskaj pravasłaŭnaj carkvy Maskoŭskaha patryjarchata. U 1980 hodzie A.Šramko skončyŭ fakultet fiziki i elektroniki Biełaruskaha dziaržuniviersiteta, a z 1994 hoda słužyŭ u Biełaruskaj pravasłaŭnaj carkvie.
Vystupajučy na pres‑kanfierencyi 25 krasavika, A.Šramko padkreśliŭ, što chryścijanie pazbaŭleny zakonnaj mahčymaści źbiracca pa damach dla čytańnia Biblii i malitvaŭ, a taksama sutyknulisia ź vialikimi pieraškodami ŭ dziejnaści niadzielnych škoł. Pavodle jaho słoŭ, zakon abmiažoŭvaje dziejnaść najbolš aktyŭnych pravasłaŭnych prychodaŭ, jakija chočuć zajmacca misijanierskaj dziejnaściu i pašyrać svoj upłyŭ u hramadstvie.
Arhanizatary kampanii, jakaja pačałasia ŭ krainie 22 krasavika, raźličvajuć sabrać nie mienš čym 50 tysiač podpisaŭ pad adkrytym zvarotam da kiraŭnika dziaržavy, Kanstytucyjnaha suda, Pałaty pradstaŭnikoŭ Nacyjanalnaha schodu z zaklikam pryvieści ŭ adpaviednaść z Kanstytucyjaj Respubliki Biełaruś zakon «Ab svabodzie sumleńnia i relihijnych arhanizacyjach», jaki dziejničaje z kanca 2002 hoda.
Artykuł "NN" ab carkoŭnym sudzie, na jakim było "rekamendavana" pazbavić ajca A. Šramka śviatarskaha sanu.
Stenahrama onłajn-kanferencyi z Alaksandram Šramkom
